Xalq deputatlari Jalaquduq tuman kengashining oltinchi chaqiriq, o‘n to‘rtinchi sessiyasidan so‘ng sektor rahbarlari hamda Prezident Administratsiyasi huzuridagi Axborot va ommaviy kommunikatsiyalar agentligi direktorining birinchi o‘rinbosari Dilshod Saidjonov ishtirokida ommaviy axborot vositalari xodimlari uchun matbuot anjumani o‘tkazilgan. Bu haqda “Daryo” muxbiri xabar berdi.
O‘zbekiston Prezidentining “Hududlarni ijtimoiy-iqtisodiy rivojlantirishni reyting baholash tizimini joriy etish to‘g‘risida”gi qaroriga asosan mahalliy hokimiyat organlari saytlarining ommaviyligi darajasi ham baholanishi belgilangan. Matbuot anjumanida “Daryo” muxbiri Dilshod Saidjonovdan ushbu reyting natijalari qachon e’lon qilinishini so‘radi.
“Matbuot xizmatlari tizimi bizning Agentlik tomonidan o‘tgan yilning iyun oyida yaratilgan. Bu Prezidentimiz tomonidan ilgari surilayotgan ochiqlik siyosatining asosi desak yanglishmagan bo‘lamiz. Ochiqlik siyosati O‘zbekistonda ikkita yo‘l bilan amalga oshiriladi. Ya’ni birinchi tomonda ommaviy axborot vositalari, ikkinchi tarafda esa davlat organlari turadi. Barchamizga ma’lumki, 2014-yilda ‘Davlat hokimiyati va boshqaruvi organlari faoliyatining ochiqligi to‘g‘risida’gi qonunimiz qabul qilingan.
Biroq qonun ijrosini ta’minlashda bir qator qiyinchiliklar vujudga kelardi. 2019-yil 27-iyunda qabul qilingan qaror esa qonuning yaxshiroq ishlashiga yo‘l ochib berdi. Qarorga asosan Agentlik tomonidan matbuot xizmatlarining faoliyatini muvofiqlashtirish, qanday ishlayotganiga baho berish, moddiy-texnik baza va yetarli oylik maoshlari bilan ta’minlanganligini aniqlash, ular yuritayotgan veb-saytlarni monitoring qilish belgilangan. Vazifamiz doirasida vazirlik va idoralar, hokimliklar hamda O‘zbekistoning elchixonalarining saytlarini aniq holatini o‘rganib chiqib, reyting tuzilgan. Natijalar bo‘yicha tegishli hujjat Vazirlar Mahkamasiga kiritilgan. Oktabr oyi davomida Bosh vazir ishtirokida yig‘ilish o‘tkazilishi belgilangan. Unda barcha matbuot xizmatlarining faoliyatiga baho beriladi va shunga asosan tegishli choralar ko‘riladi”, — dedi Dilshod Saidjonov.
Prezidentning 2019-yil 27-iyundagi qaroriga asosan agentlik zimmasiga davlat organlari va tashkilotlaridagi axborot xizmatlari xodimlari va rahbarlarining malakasini oshirish kurslarini tashkil etish belgilangan bo‘lsa-da, nega qaror ijrosi ta’minlanmayotgani haqida so‘ragan “Daryo” muxbiriga Saidjonov quyidagicha javob berdi: “Agentlik rejasida hududlardagi axborot xizmati rahbarlari hamda xodimlari ishtirokida seminar-treninglar o‘tkazish bor. Barcha trenerlar tayyor. Biroq, pandemiya sababli ortga surilmoqda. Birdaniga yuzlab matbuot kotiblarini Toshkentga chaqirishning imkoni yo‘qligi uchun hozirda qanday qilib tashkillashtirish bo‘yicha bosh qotirayapmiz. Balkim, trenerlarimizni hududlarga chiqarib o‘qitishimiz ham mumkin. Lekin unda biz maqsadimizga erisha olmaymiz. Chunki, ularni joyidan qo‘zg‘atib poytaxtda o‘qitadigan bo‘lsak, o‘zlariga keraklik bilimlarni egallashadi. Joriy yilning mart oyida faqat markaziy idoralar matbuot kotiblarini o‘qitdik, xolos. Bu Sardoba voqeasini hamda karantindagi vaziyatni yoritishda juda asqatdi”,— dedi Dilshod Saidjonov.
Izoh (0)