Uzbekistan Airways hozirda loukoster (chipta bahosi arzon) aviakompaniyani tashkil etishni rejalashtirmayapti. Bu haqda kompaniya boshqaruvi raisining birinchi o‘rinbosari Umid Husanov 5-oktabr kuni Monopoliyaga qarshi kurashish qo‘mitasida bo‘lib o‘tgan matbuot anjumanida ma’lum qildi, deya xabar bermoqda “Daryo” muxbiri.
“Ha, biz milliy aviakompaniya qoshida loukoster tashkil etishni rejalashtirgan edik. Ammo rejalarimizni qayta ko‘rib chiqib, loukosterni tashkil etmay turishga qaror qildik. Biz Uzbekistan Airways aviakompaniyasini rivojlantirish bo‘yicha strategiyani ishlab chiqqanmiz, unda ham loukosterlarni tashkil etish rejasi yo‘q”, — dedi Umid Husanov.
O‘zbekistonda loukosterlar tashkil etilishi mumkinligi haqidagi dastlabki gap-so‘zlar 2018-yil boshida, Qozog‘istonning Aqto‘be viloyatida 52 nafar o‘zbekistonlik mehnat muhojiri nosoz avtobusda tiriklayin yonib ketganidan so‘ng ko‘tarilgan edi. O‘shanda Umid Husanov bunday aviakompaniya 2018-yil oxirigacha tashkil etilishi, unda Toshkentdan Moskvaga 100 dollarga uchib borish mumkin bo‘lishini ta’kidlab o‘tgan edi.
2020-yil boshida bosh vazir Abdulla Aripov Humo Air aviakompaniyasi tashkil etilishini e’lon qilgandi. Hukumat rahbarining so‘zlariga ko‘ra, 2020-yilda tashkil etilishi kerak bo‘lgan bu aviakompaniya “avvaliga respublika ichida past narxda muntazam aviareyslarni” amalga oshirishi kerak edi. Keyinchalik “Maxsus aviatsiya xizmatlari” aviakompaniyasi ixtiyoridagi 43 ta An-2 samolyotlari Humo Air’ga berilishi haqida xabarlar paydo bo‘ldi.
Shuningdek, 2020-yilgi Davlat dasturiga beshta yangi aviakompaniya tashkil etish ham kiritilgan edi. Umuman, mamlakatda aviakompaniyalar soni ko‘payishi haqida 2018-yilda bosh vazir birinchi o‘rinbosari Ochilboy Ramatov, 2020-yilda bosh vazir o‘rinbosari Aziz Abduhakimov, transport vaziri Elyor G‘aniyev ham gapirgan. Biroq amalda “O‘zbekiston havo yo‘llari”ni Uzbekistan Airways, Uzbekistan Airports va Uzbekistan Helicopters’ga bo‘lishdan boshqa ish bo‘lmadi.
Izoh (0)