Saida Mirziyoyeva “Mendirman Jaloliddin” seriali haqida: Kun kelib tarixiy shaxslar haqidagi film suratga olinishiga o‘z hissamni qo‘shaman, derdim

Tashkent City’da “Mendirman Jaloliddin”  tarixiy serialining birinchi qismi taqdimoti bo‘lib o‘tdi. Bu haqda “Daryo” muxbiri Feruz Muhammad ma’lum qildi.

Taqdimotda O‘zbekiston Prezidenti maslahatchisi Abdujabbor Abduvohidov, O‘zbekiston madaniyat vaziri Ozodbek Nazarbekov, Milliy mass-mediani qo‘llab-quvvatlash va rivojlantirish jamoat fondi Vasiylik kengashi raisi o‘rinbosari Saida Mirziyoyeva, Turkiyaning O‘zbekistondagi favqulodda va muxtor elchisi Mehmet Surayya Er, “Bozdag‘ film” kinokompaniyasi rahbari Mehmet Bo‘zdag‘ va “Orient Finans Bank” boshqaruv kengashi raisi Bobur Parpiyev tarixiy serial, uning suratga olish jarayonlari haqida gapirdi.

Milliy mass-mediani qo‘llab-quvvatlash va rivojlantirish jamoat fondi Vasiylik kengashi raisi o‘rinbosari, loyiha rahbari Saida Mirziyoyeva serial g‘oyasining qo‘llab-quvvatlash sababi, pandemiya sabab serial bu yil yakunlanmay qolishidan xavotir olgani haqida gapirdi.

Bugun nafaqat taqdimot marosimi, balki o‘zbek milliy kinochiligimizda yangi sahifa ochiladi, desak mubolag‘a bo‘lmasa kerak. Umid qilamanki, bu fikrimga serialni tomosha qilib o‘zingiz ham amin bo‘lasiz.

Dadam Samarqand viloyati hokimi lavozimiga tayinlanib, biz Jizzaxdan Samarqandga ko‘chib kelganimizda, bu shahar menda qanday taassurot qoldirganini juda yaxshi eslayman. Dadam ozgina bo‘sh vaqt topdilar deguncha bizga Samarqandni ko‘rsatar, tarixiy obidalar bilan tanishtirar va buyuk tarixiy shaxslar haqida so‘zlab berar edilar.

Bo‘sh vaqtimda tez-tez o‘sha qadimiy maskanlarni ziyorat qilib, buyuk qahramonlar hayotini o‘rganar edim. Shohi Zinda, Bibixonim, Registon maydonida yurar ekanman, xayolimda o‘sha tarixiy davrlarni tasavvur qilar edim. Go‘yo atrofimda bir necha asr oldingi hayot qaynayotgandek, sershovqin bozorlar, otlarning kishnashi va saroy sahnalari, tasavvurimdagi o‘sha ajib voqealar xotiramda bir umrga muhrlanib qolgan.

Bir kun kelib, imkoni bo‘lishi bilanoq o‘tmishdagi buyuk tarixiy shaxslar haqida biror film olinishiga o‘z hissamni qo‘shaman, degan niyat bo‘lar edi. Chunki, faqat filmlar orqaligina o‘sha manzarani tasvirlab berish mumkin, deb o‘ylardim. Bir so‘z bilan aytganda, mening tarixga bo‘lgan qiziqishim aynan Samarqanddan boshlangan.

Yillar o‘tib, taqdir taqozosi bilan men O‘zbekiston imijini xorijiy davlatlarda shakllantirish, matbuot va targ‘ibot ishlariga mas’ul bo‘lib faoliyat yuritishni boshladim. Shu asnoda bundan bir yarim yil oldin hozirgi Madaniyat vaziri Ozodbek Nazarbekov tomonidan Xorazmshoh Jaloliddin Manguberdi haqida turk hamkasblari bilan serial suratga olish taklifi berildi.

Albatta, biz bu g‘oyani qo‘llab-quvvatladik. Chunki, o‘zingiz yaxshi bilasiz, afsuski, o‘zbek milliy kinochiligida tarixiy shaxslar, buyuk allomalarimiz hayotiga bag‘ishlangan seriallar deyarli yo‘q darajada. Seriallar yaratilishi esa nafaqat tarixni o‘rganish, balki buyuk bobolarimiz hayoti bilan yaqindan tanishish imkonini beradi. Bunday seriallar har bir o‘zbek millati vakilida milliy g‘ururni shakllantiradi, o‘zbek xalqining qaddini yanada baland ko‘taradi.

Jarayon boshlandi. ‘Orient Finans Bank’ bu loyihani to‘liq moliyalashtirishga rozi bo‘ldi. Turkiya ijodkorlari bilan hamkorlikda o‘ttiz gektarlik yerda suratga olish maydonlari yaratildi. Jaloliddin saroyi, jang maydonlari barpo etildi. O‘sha davrdagi milliy kiyimlarimiz, urf-odat va an’analarimizning har bir detallariga alohida yondashildi.

Hammasi juda yaxshi ketayotgandi, lekin pandemiya balosi bizning ishlarimizga ham jiddiy zarar keltirdi. Karantin davrida suratga olish ishlari rejadan chiqib ketdi. Qanchadan qancha ijodkorlar Turkiyada yashab, o‘sha yerda sabr qilishlariga to‘g‘ri keldi. Ochig‘ini aytaman, loyihamizning bu yilda yakunlanishiga shubha qila boshladim.

Lekin Allohning qo‘llab-quvvatlashi, fidoiy ijodkorlarimizning say’i-harakatlari bilan mana bugun taqdimot kuniga ham yetib keldik.

Bugun ushbu serialning birinchi qismini namoyish qilamiz. Albatta, bu serial turli bahs, munozara, balki tanqidlarga ham uchrar. Biz bunga tayyormiz. Biz har bir fikrni hurmat qilamiz va fikrlar xilma-xilligini qo‘llab-quvvatlaymiz. Nima bo‘lganda ham oldimizga qo‘ygan har bir rejamizni bajaramiz. Bu loyihani ham uddalay oldik, deb o‘ylayman.

Buning uchun barcha ijodkorlarga, aktyorlarimizga, homiy ‘Orient Finans Bank’ga, Madaniyat vazirligiga va shaxsan Ozodbek Nazarbekov hamda loyiha bosh prodyuseri Mehmed Bozdag‘ga katta rahmat aytmoqchiman. Yana bir bor g‘urur bilan aytaman, biz uddaladik.

Saida Mirziyoyeva, Milliy mass-mediani qo‘llab-quvvatlash va rivojlantirish jamoat fondi Vasiylik kengashi raisi o‘rinbosari, loyiha rahbari

Ma‘lumot uchun, “Mendirman Jaloliddin” serialining birinchi fasli 13 qismdan iborat. Loyiha rahbari Milliy mass-mediani qo‘llab-quvvatlash va rivojlantirish jamoat fondi Vasiylik kengashi raisi o‘rinbosari Saida Mirziyoyeva. G‘oya muallifi hamda prodyuser O‘zbekiston Respublikasi Madaniyat vaziri Ozodbek Nazarbekov. Film Turkiyaning “Bozdag‘ film” kompaniyasi tomonidan suratga olinmoqda. Keng jamoatchilik uchun premyera 2021-yilning yanvar oyidan boshlanadi.