Namanganda o‘ziga o‘t qo‘yib, shu tarzda ikki yarim yil muqaddam sotib olingan uyidan majburan chiqarmoqchi bo‘lgan MIB xodimlariga noroziligini bildirgan ayol vafot etgan, voqeasi yuzasidan jinoiy ish ochilgandi. “Kun.uz”ning xabar berishicha, MIB marhumaning onasiga ijro harakatlarini bajarishini so‘rab 30-martadan ortiq murojaat qilingan. Bu haqda 3-oktabr kuni MIBning Namangan viloyat boshqarmasida o‘tkazilgan maxsus brifingda ma’lum qilingan.
Namangan shahrida istiqomat qilgan 35 yoshli marhuma Gulandom Dadaboyeva ijro harakatlari davrida o‘z ustiga benzin quyib yoqishi natijasida 29-sentabr kuni o‘z joniga qasd qilib, vafot etgandi.
MIB Namangan shahar bo‘limi ish yurituvida fuqarolik ishlari bo‘yicha Namangan tumanlararo sudining 2019-yil 8-oktabrdagi hal qiluv qaroriga ko‘ra undiruvchi A.J. foydasiga javobgar – marhumaning onasi Muhabbat Dadaboyeva va uning oila a’zolarini Namangan shahridagi xonadonlardan biridan majburiy tartibda ko‘chirish belgilangan.
“Mas’ul xodimlar Majburiy ijro organlari sud va boshqa organ hujjatlari ijrosini ta’minlaydi va buni muhokama qilmaydi, lekin doim qarzdorlarga sud qarorini ixtiyoriy bajarishi uchun va haqiqiy ahvoldan kelib chiqib, insonparvarlik nuqtayi nazaridan yondashib kelinishini ta’kidladilar.
Qarzdor Muhabbat Dadaboyevaning uydan chiqish ijro ishi bo‘yicha ijro harakatlari jami turli sabablar bilan 3-marta to‘xtatilgan, qolaversa ijro ishi Byuroning Namangan shahar bo‘limiga 2019-yil noyabr oyida kelgan bo‘lib, davlat ijrochilari 3 marotaba qarzdorning uyiga borib, o‘z ixtiyori bilan sud qarorini bajarishga undab kelgan.
Bu kabi sud qarorlari bo‘yicha kimdir qarzdor, ikkinchi tomon esa, undiruvchi bo‘ladi. Ushbu ijro ishi bo‘yicha ham undiruvchi A.J. tomonidan sud qarori ijrosi ta’minlanmayotgani haqida ko‘plab e’tirozlar va bir nechta shikoyat arizalari bildirilib, turli shaklda 30 dan ortiq murojaat qilingan”, — deyiladi MIB matbuot xizmati tomonidan taqdim etilgan ma’lumotda.
Bu masala bo‘yicha Senat raisi Tanzila Norboyeva o‘z munosabatini bildirgan.
“Bu holatni men mutlaqo qoralayman. Balkim bu o‘rinda ayol qaysidir ma’noda nohaqdir, Majburiy ijro byurosi to‘g‘ri talabni qo‘ygandir. Lekin shunda ham ayolning holatini tushunish mumkin edi. Oddiy gaplashganda ham kimdir charchab qolgan, kimdir asabiylashgan, kimdir o‘zini tutolmayotganini sezish mumkin. Bu ham ayb emas, uning salomatligida qandaydir muammo kuzatilayotgan bo‘lishi mumkin.
Mana shunday holatda Majburiy ijro byurosi o‘zining ichki qarori bilan ijroni ma’lum bir muddat keyinroqqa surishi, ayol o‘ziga kelgach, yaqinlari orqali tushuntirib, so‘ngra yana shug‘ullanishi mumkin edi.
Bu holatda Majburiy ijro byurosining ham xatosi bor, degan xulosaga keldim”, — degan Oliy Majlis Senati raisi Tanzila Norboyeva Namangan viloyati Yangiqo‘rg‘on tumanida qilgan chiqishida.
Izoh (0)