Qoraqalpog‘iston Jo‘qorg‘i Kengesining 2-oktabr kuni Prezident Shavkat Mirziyoyev ishtirokida bo‘lib o‘tgan navbatdan tashqari sessiyasida respublikaning yangi rahbari nomi ma’lum bo‘ldi — 20-sentabr kuni bo‘lib o‘tgan saylovlar natijasiga ko‘ra Jo‘qorg‘i Kenges a’zosiga aylangan, bungacha Prezident huzuridagi Orolbo‘yi xalqaro innovatsiya markazi direktori sifatida faoliyat olib borgani aytilayotgan ekofaol Murat Kamalov endi (agar orada biror boshqa favqulodda holat yuz bermasa) kamida 2024-yilga qadar Qoraqalpog‘istonga rahbarlik qiladi.
Jo‘qorg‘i Kengesning avvalgi raisi Musa Yerniyazov 2020-yil 31-iyul kuni koronavirus infeksiyasi asoratlari oqibatida vafot etgan edi (unda kasallik 24-iyun kuni tasdiqlangan, shunga qaramay uning koronavirusga chalingani 18-iyulga qadar jamoatchilikdan yashirilgan edi). Yerniyazovgacha kengashga Timur Kamolov (1997—2002-yillarda) va Ubbiniyaz Ashirbekov (1992—1997-yillarda) raislik qilgan. Qoraqalpog‘iston Konstitutsiyasining 80-moddasiga muvofiq, Jo‘qorg‘i Kengesning raisi Qoraqalpog‘iston rahbari va eng yuqori lavozimli shaxsidir.
Izoh (0)