Davomi: “U otasining ishlarini davom ettirib, xalqni rozi qiladi, deb ishonaman” — Shavkat Mirziyoyev Qoraqalpog‘istonning yangi rahbari haqida, Qoraqalpog‘istonning barcha rahbarlari — bitta suratda
Xabar berishlaricha, yig‘ilishni Jo‘qorg‘i Kenges raisining o‘rinbosari Atabek Davletov ochgan. Sessiyaning kotibiyati saylanib, kun tartibi tasdiqlangan, Oqsoqollar kengashi va Hisob-sanoq komissiyasi tarkibi tuzilgan.
“Bugun qoraqalpoq elini, tuprog‘ini, imkoniyatlarini yaxshi bilgan, xalq tanigan, turli masalalarni hal qila oladigan yetakchini saylab olishimiz kerak. Berdaq bobomizning dono so‘zlari bilan aytganda: “Xalqning g‘amini o‘ylagan, Yurt g‘amxo‘ri kerak menga’”, — deb ta’kidlagan yig‘ilishda so‘zga chiqqan Shavkat Mirziyoyev.
Oqsoqollar kengashining qaroriga muvofiq, Jo‘qorg‘i Kenges raisi lavozimiga Murat Qallibekovich Kamalov nomzodi tavsiya etilgan. Prezident Mirziyoyev Murat Kamalovning “insoniy fazilatlari, fidoyiligi va rahbarlik qobiliyatini hisobga olib”, uning nomzodiga o‘z roziligini bildirgan.
“Jo‘qorg‘i Kenges deputatlari, jamoatchilik vakillari so‘zga chiqib, nomzodni qo‘llab-quvvatladi. Yashirin ovoz berish yo‘li bilan Qoraqalpog‘iston Jo‘qorg‘i Kengesi raisi lavozimiga Murat Kamalov saylandi”, — deyiladi Prezident matbuot xizmati axborotida.
Qoraqalpog‘iston Konstitutsiyasining 80-moddasiga muvofiq, Jo‘qorg‘i Kengesning raisi Qoraqalpog‘iston rahbari va eng yuqori lavozimli shaxsidir. Jo‘qorg‘i Kenges raisi ayni organ tomonidan O‘zbekiston Prezidentining roziligi bilan hamda Qoraqalpog‘iston Jo‘qorg‘i Kengesining deputatlari orasidan yashirin ovoz berish yo‘li bilan Jo‘qorg‘i Kengesning vakolati muddatiga saylanadi.
Eslatib o‘tamiz, 65 yoshli Murat Kamalov 2020-yil 20-sentabr kuni bo‘lib o‘tgan navbatdan tashqari saylovlar vaqtida Jo‘qorg‘i Kenges deputati etib saylangan edi. Saylovlar arafasida e’lon qilingan nomzodlar ro‘yxatidagi ma’lumotlarga ko‘ra, Ekopartiya a’zosi hisoblangan Kamalov saylovgacha Prezident huzuridagi Orolbo‘yi xalqaro innovatsiya markazi direktori lavozimida ishlab kelgan.
Qoraqalpog‘istonning Murat Kamalovdan avvalgi rahbari hisoblangan Musa Yerniyazov 2020-yil 31-iyul kuni koronavirus infeksiyasi asoratlari oqibatida vafot etgan edi.
Izoh (0)