AQShning Xalqaro taraqqiyot agentligi (USAID) 30-sentabr kuni O‘zbekistonda ikki tomonlama missiya tashkil etilganligini e’lon qildi. Bu haqda AQShning O‘zbekistondagi elchixonasi xabar qildi.
Bungacha agentlikning O‘zbekistondagi vakolatxonasi Markaziy Osiyoda (Olmaotada) USAID missiyasining tarkibiga kirgan. Bir vaqtning o‘zida Tojikistonda yangi USAID missiyasi ochilgan.
“Missiyalar USAID faoliyatining markazidir va Qo‘shma Shtatlar mamlakat hukumati va aholisi bilan to‘g‘ridan to‘g‘ri va mazmunli munosabatlarni o‘rnatishga sodiqligini namoyish etadi”, – dedi Jon Barsa.
Jon Barsaning ta’kidlashicha, missiyalar USAID faoliyat yuritadigan asosiy markaz bo‘lib, u Qo‘shma Shtatlarning hukumat hamda mamlakat xalqi bilan to‘g‘ridan to‘g‘ri va sermazmun munosabatlarni o‘rnatishga sodiqligini namoyish etadi. Shuningdek, ushbu missiyalar mintaqadagi faoliyatini muvofiqlashtirishga yordam berib, Markaziy Osiyodagi biror-bir davlat e’tibordan chetda qolmasligini ta’minlaydi.
Jon Barsa fevral oyida AQSh prezidenti Donald Tramp ma’muriyati 2019–2025-yillarda Markaziy Osiyo bo‘yicha AQShning yangi strategiyasini tasdiqlaganini eslab o‘tdi. Qayd etilishicha, yangi missiyalarning ochilishi ushbu strategiyani amalga oshirishning bir qismidir.
Onlayn tadbirda so‘zga chiqqan O‘zbekistonning AQShdagi elchisi Javlon Vahobov rasmiy Toshkent USAID’ning O‘zbekistondagi keng ko‘lamli islohotlarni qo‘llab-quvvatlashi va uning mamlakat taraqqiyotiga qo‘shgan hissasini yuqori baholashini ta’kidladi.
U Markaziy Osiyo bo‘yicha AQSh strategiyasining maqsadlari O‘zbekistonning ustuvor yo‘nalishlari va qarashlariga to‘g‘ri kelishini ta’kidladi.
Elchi, shuningdek, AQShga koronavirus pandemiyasiga qarshi kurashda ko‘rsatgan gumanitar va texnik yordami, shuningdek, Sardoba suv ombori to‘g‘onining buzilishidan zarar ko‘rgan Sirdaryo viloyati aholisini qo‘llab-quvvatlagani uchun minnatdorlik bildirdi.
Yangi missiyalar 2021-yilda to‘liq ishga tushirilishi kutilmoqda.
Izoh (0)