“Daryo”ni Telegram’da o‘qing! Join!
11:00, 01.10.2020 34504

Eldor Shomurodov “Jenoa”ga o‘tmasligi mumkin. Unga A Seriyaning yana ikki klubi xaridor

“Jenoa” sport direktori Daniele Fajiano “Rostov” hujumchisi Eldor Shomurodov transferi amalga oshishini tasdiqlagan bo‘lsa-da, kelishuv so‘nggi pallada to‘xtashi mumkin.

Foto: Twitter/@rostovfc

Metaratings ma’lumotlariga ko‘ra, O‘zbekiston milliy terma jamoasi futbolchisiga “Jeanoa”dan tashqari, A Seriyaning yana ikki klubi — “Verona” va “Fiorentina” qiziqish bildirgan. Ular Eldor ushun 10 million yevrogacha bo‘lgan mablag‘ni to‘lashga tayyor.

“Fiorentina” Shomurodov uchun belgilangan miqdorni to‘liq to‘lamoqchi, “Verona” va “Jenoa” esa bo‘lib to‘lashni imkoniyatidan foydalanmoqchi. Shuni hisobga olib, Eldorning “Jenoa”ga o‘tmaslik ehtimoli mavjud.

Qayd etish joiz, “Rostov” hali “Verona” va “Fiorentina”dan rasmiy taklif olmagan, Don klubi italiyaliklardan rasmiy xatni 1-oktabr, payshanba kunining oxiriga qadar kutishini ma’lum qilgan.

Avvalroq genuyaliklar klubi Shomurodov uchun 7,5 million yevro taklif qilayotgani, shuningdek, Eldorning o‘zi yiliga 600–700 ming yevro maosh olishi va A Seriya jamoasi o‘zbekistonlik futbolchi bilan kamida 3 yillik shartnoma imzolashi kutilayotgani haqida xabar berilgandi.

Ma’lumot uchun, Eldor rostovliklar safida 2017-yildan beri to‘p tepib keladi. Mazkur vaqt mobaynida u 91 o‘yinda maydonga tushib, 18 ta gol urdi va 12 ta golli uzatma amalga oshirdi. Uning “Rostov” bilan amaldagi shartnomasi 2024-yilgacha mo‘ljallangan.

25 yoshli futbolchi “Mash’al” akademiyasi tarbiyalanuvchisi hisoblanib, “Rostov”dan avval “Bunyodkor” safida harakat qilgan.

Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!

Izoh qoldirishdan avval, qoidalar bilan tanishib oling: http://dy.uz/QbkeZ

Boshqa yangiliklar