Ijtimoiy tarmoqlarda Toshkent ko‘chalarida katta tezlikda Mercedes-Benz ekanligi taxmin qilingan avtomobilni boshqarayotgan yigit aks etgan video tarqaldi. Mazkur video TikTok ijtimoiy tarmog‘iga Dilshod_550 nomli foydalanuvchi tomonidan joylangan. Videoga bloger Nikita Makarenko e’tibor qaratdi va bu yigit haqida o‘zining kanalida bir nechta postlar yozdi.
“Potensial qotil, Dilshod ismli 01K550XA raqamli avtomashina haydovchisi, jarimalarni yig‘adi va ularni TikTok‘da g‘urur bilan namoyish etadi. Qiziq, u kimning farzandi ekan-a?”, — deya yozgan Nikita Makarenko foydalanuvchining avtomashinada 150 km/soat tezlikda harakatlangani aks etgan video ostida.
Bundan tashqari, foydalanuvchi tomonidan tarmoqqa joylangan suratlarda u yo‘l harakati qoidalarini buzgani uchun tuzilgan ma’muriy bayonnomalarni “kolleksiya” sifatida to‘plashi va o‘z sahifasiga joylab borishini ko‘rish mumkin. Foydalanuvchi tomonidan Instagram’ga joylagan suratlardan birining ostiga #hokimiyat heshtegi qo‘yilgan. Suratda yigitning xizmat xonasida o‘tirgani aks etgan. Bundan tashqari, foydalanuvchi 16-fevral kuni joylagan videoda haydovchi Toshkent ko‘chalarida mashinani 150 km/soat tezlikka chiqargani aks etgan.
Nikita Makarenko mazkur yigit Olmaliq shahar hokimi Usmon Ismoilovich Rahimovning o‘g‘li Ismoilov Dilshod Usmon o‘g‘li ekanini aniqlagan.
“Kun.uz”ning Toshkent viloyat hokimligi matbuot xizmati rahbari Behzod Qobulovga tayanib yozishicha, Olmaliq shahar hokimi Usmon Rahimov videodagi haydovchi uning farzandi ekanini tasdiqlagan, ammo tarmoqqa joylangan bu videolarga “ancha vaqt bo‘lgan”ini aytgan.
“Gazeta.uz” mazkur holat yuzasidan Olmaliq shahri hokimi Usmon Rahimov bilan bog‘langan. Hokim videoda aks etgan voqea 4-5 oy oldin sodir bo‘lganini ma’lum qilgan.
“O‘shanda u buning uchun jarimaga tortilgandi. Tezlikni oshirgani uchun men unga rulga o‘tirishni taqiqladim. U 3-4 oydan buyon avtomobil boshqarmayapti. Mashina Tracker edi, Mercedes-Benz emas. Shunchaki mashinaga Mercedes-Benz’ning ruli o‘rnatilgandi. Tracker mashinasi Nurafshon Avtocentr avtosalonidan kreditga olingandi, hozircha mashina qiymatining yarmi to‘langan. Biz mashinani sotmoqchi edik, biroq to‘lanmagan kredit sababli bu ishni qila olmadik”, — deya ma’lum qilgan shahar hokimi.
Hokimning so‘zlariga ko‘ra, mashina Dilshod Ismoilov kichik ukasini Toshkentga o‘qishga olib borib kelishi uchun kreditga olingandi. Hokimning aytishicha, hozirgi kunda avtomobilni ishonchnoma asosida G‘ayrat Bakdavletov boshqarmoqda.
“O‘g‘limning harakati, albatta, noto‘g‘ri. Bilmadim, balki men noto‘g‘ri tarbiya berdimmi? Men biror marta so‘kmaganman, unga qo‘l ko‘tarmaganman. Bizning oilamizda hech kim ichmaydi, chekmaydi. Men yuzaga kelgan vaziyatdan juda afsusdaman. O‘zim Olmaliq hokimi bo‘lib ishlayman. Oilam bilan ko‘rishish uchun haftada bir marta uyga boraman. O‘g‘lim chekmaydi, ichmaydi. Tan olaman, u tezlikni oshirgan, shuning uchun endi rulga o‘tirmayapti”, — deya ta’kidlagan Usmon Rahimov.
Eslatib o‘tamiz, 2019-yilning iyul oyida “Ozodlik” radiosi O‘zbekiston Prezidentining kenja kuyovi Otabek Umarovning Instagram-akkaunti Stories bo‘limida joylashtirilgan videoni e’lon qilgandi. Videoda Otabek Umarov Toshkent ko‘chalarida Tesla avtomobili tezligini soatiga 201 kilometrgacha chiqarganini ko‘rish mumkin. Keyinroq Otabek Umarov tezlikni oshirgani uchun 1,8 million so‘m jarima to‘laganini ma’lum qilgandi.
Izoh (0)