Armaniston Mudofaa vazirligining ma’lum qilishicha, Turkiya Harbiy havo kuchlarining F-16 qiruvchi samolyoti Armanistonning Su-25 samolyotini urib tushirgan. Bu haqda Meduza xabar berdi.

Foto: EADaily

Xabar qilinishicha, hodisa oqibatida samolyot uchuvchisi halok bo‘lgan. Hodisa yuz bergan vaqtda F-16 qiruvchisi Armaniston havo hududida, chegaradan 60 kilometr masofada bo‘lgan.

Turkiya prezidenti ma’muriyati va Ozarbayjon Mudofaa vazirligi tomonidan ma’lum qilinishicha, Turkiya qiruvchisi Armaniston samolyotini urib tushirmagan.

Turkiya 27-sentabr kuni Tog‘li Qorabog‘dagi janglar boshlanganidan keyin Ozarbayjonni qo‘llab-quvvatlashini ma’lum qildi. 29-sentabr kuni Anqara ittifoqchisini qo‘llab-quvvatlash uchun barcha choralarni, jumladan harbiy choralarni ko‘rishga tayyorligini rasman e’lon qildi.

Armaniston 28-sentabr kuni Ozarbayjon tomonida yollanma harbiylar jang qilayotganini va Turkiyaning harbiy texnikasi va qurollaridan foydalanayotganini ma’lum qildi. Anqara va Boku bu ma’lumotni rad etdi.

Avvalroq rasmiy Yerevan Ozarbayjon Armanistondagi harbiy qismga zarba berganini ma’lum qilgandi.