O‘zbekiston koronavirusga qarshi vaksinani barcha sinovlar tugaganidan keyin ishlab chiqarish va eksport qilishni rejalashtirmoqda

O‘zbekiston koronavirusga qarshi vaksinani ishlab chiqarish va eksport qilishni rejalashtirmoqda, bu sinovlarning uchinchi — yakuniy bosqichi tugagandan keyin amalga oshirilishi mumkin. Bu haqda Sanitariya-epidemiologiya osoyishtaligi agentligi direktori, sog‘liqni saqlash vazirining birinchi o‘rinbosari Bahodir Yusupaliyev 25-sentabr kuni Xalqaro press-klub yig‘ilishida ma’lum qildi, deb yozmoqda “Gazeta.uz”.

Avvalroq koronavirusga qarshi vaksina yaratgan Xitoyning ikkita kompaniyasi O‘zbekistonda sinovlarning uchinchi bosqichini hamkorlikda o‘tkazishni taklif qilgandi. Innovatsion rivojlanish vazirligi Sinopharm va Zhifei Longcom kompaniyalari bilan kelishuvlar imzolagan.

“O‘zbekistonga Xitoyning ikkita kompaniyasi vaksinalarini olib kelish va klinik sinovlarning uchinchi bosqichida ishtirok etish rejalashtirilmoqda. Keyin esa bu vaksinalarni bizda ishlab chiqarish masalasi qo‘yiladi, bu importning qisqarishiga olib keladi, buning ustiga biz ularni qo‘shni mamlakatlarga ham eksport qila olamiz”, — deya ma’lum qilgan Bahodir Yusupaliyev.

Uning so‘zlariga ko‘ra, O‘zbekiston Rossiya kompaniyalariga ham qo‘shma sinovlar o‘tkazishni taklif qilgan. “Bugungi kunda biz ularning javoblarini kutyapmiz. O‘ylaymanki, ular bilan ham bir vaqtda ishlaymiz”, — deya ta’kidlagan agentlik rahbari.

Eslatib o‘tamiz. O‘zbekiston Rossiyaning to‘g‘ridan to‘g‘ri investitsiyalar jamg‘armasiga besh ming doza “Sputnik V” vaksinasini ajratishni so‘rab murojaat qilgani haqida xabar berilgandi. Bunda jamg‘arma Laxisam kompaniyasi bilan O‘zbekistonga mazkur vaksinadan 35 million doza yetkazib berish bo‘yicha kelishuvga erishilganini ma’lum qilgan.

Avvalroq O‘zbekiston COVID-19 vaksinasi klinik sinovlarining barcha bosqichi yakunlanmagunicha uni sotib olmasligi ma’lum qilingandi. Avgust oyi boshlarida Shavkat Mirziyoyev koronavirusga qarshi vaksinani xarid qilish masalasini o‘rganishga bir hafta muddat bergandi. Prezident topshirig‘iga binoan vaksinani xarid qilish va mamlakat aholisini emlashni amalga oshirish yo‘llarini o‘rganib chiqish maqsadida yetakchi olimlar va tajribali shifokorlardan iborat ishchi guruh tuzilgan.