Ayollar garderobidagi liboslar, albatta, nafis, har tomonlama qulay hamda urfga monand bo‘lishi zarur. Quyida allaqachon trenddan qolgan bo‘lsa-da, kiyim do‘konlarida sotilishda davom etayotgan 10 ta libos haqida ma’lumotga ega bo‘lishingiz mumkin.

Burmali ko‘ylak

Foto: “dressa.com”

Bel qismida burmasi bo‘lgan liboslar taxminan olti yil avval urfda bo‘lgan. Ammo bu uslubni unutish vaqti keldi. Agar shunday burmali liboslar chindan ham yoqsa, uni yangi bichimdagi liboslar bilan uyg‘unlashtirish mumkin.

Mallet liboslar

Foto: “dressa.com”

Etakning old qismi kalta, orqasi esa uzun liboslar negadir hanuzgacha dizaynerlar tomonidan taqdim etilmoqda. Bu kabi liboslarning kundalik va ziyofat uchun mo‘ljallangan turdagilari ham ancha yillar avval ommalashgan. Mallet libosini kiyishni istaganlar bu borada mutaxassis bilan maslahatlashib ko‘rgani ma’qul.

Shoyi ko‘ylak

Foto: “fashion.ru”

Shoyi matosidan tikilgan liboslar ham urfda emasligi barchaga ayon, ammo kiyim do‘konlarida bu kabi liboslar sotilishda davom etmoqda. Demak, uni xarid qilayotgan ayollar ham topiladi. Lekin gul va naqsh urilgan liboslar bundan mustasno.

Qanot yengli liboslar

Foto: “fashion.ru”

Aynan yoz kunlarida juda qulay hisoblangan libos. Afsuski, qanot yengli liboslar o‘rniga keng va fonar shaklidagi fransuz modeli trendga kirgan. Qanot yengli liboslar esa ko‘proq qizaloqlar uchun loyiq ko‘rilmoqda.

To‘rli ko‘ylaklar

Foto: “dress-style.ru”

To‘rli ko‘ylaklarni kiyish juda qiyin, sababi boshqa liboslarga nisbatan ko‘proq ehtiyotkorlikni talab etadi. Shuningdek, to‘liq to‘rli liboslar ancha yillar avval urfdan qoldi. Faqat to‘y va marosim liboslarida bezak uchun qisman foydalanilmoqda. Lekin asosiy mato sifatida deyarli foydalanilmaydi.

Lolasimon etakli ko‘ylaklar

Foto: “dress-style.ru”

Etak qismi lola shaklida bo‘lgan liboslarni ham garderobdan chiqarish vaqti keldi. Ayniqsa, uni ingichka belbog‘ bilan kiyish ayollar orasida ommalashgan edi. Hozirda esa uning o‘rnini bosuvchi zamonaviy liboslar dizaynerlar tomonidan taqdim etilmoqda.

Sviter liboslar

Foto: “ozali.ru”

Qomatga yopishib turuvchi sviter ko‘ylaklarning ham garderobni tark etish vaqti keldi. Uning o‘rnini oversayz uslubidagi keng liboslar egalladi. Ayniqsa, ularni krossovka yoki poyabzal bilan kiyish yangi ko‘rinish yasaydi.

Yopishqoq ko‘ylaklar

Foto: “fashion.ru”

Bir paytlar jozibadorlikni ifodalash uchun kiyilgan bu liboslar chindan ham urfda edi, endi esa aksincha. Hozirda bunday liboslardan yuqori didga ega har qanday ayol qochadi.

Yoqali liboslar

Foto: “fashion.ru”

Ba’zi odamlar yoqali ko‘ylaklarni rasmiy uslubdagi liboslar sirasiga kiritadi. Ehtimol, 10 yil avval shunday bo‘lgan bo‘lishi mumkin, ammo hozirda u maktab o‘quvchisi libosini eslatadi.

Qo‘ng‘iroq etakli ko‘ylaklar

Foto: “fashion.ru”

Yuqori qismi tor, etagi qo‘ng‘iroq shaklidagi liboslar o‘tgan asrning 50-yillarida ommalashgan. Ushbu bichim urfdan qolgan bo‘lsa-da, nok shaklidagi qomat egalari hanuzgacha bu qolipdagi liboslarni kiyishda davom etmoqda.