O‘zbekistonda svetoforlarning ruxsat beruvchi chiroqlari vaqt oralig‘i qayta ko‘rib chiqiladi

O‘zbekiston Prezidentining “Ommaviy sportni rivojlantirish va sog‘lom turmush tarzini har bir fuqaroning hayotiga kiritishga qaratilgan chora-tadbirlar to‘g‘risida”gi qarori loyihasi e’lon qilindi.

O‘zbekiston Respublikasi Ichki ishlar vazirligi Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari bilan birgalikda bir oy muddatda piyodalar o‘tish yo‘laklarida yo‘l-transport hodisalarining sonini keskin qisqartirish, shuningdek, aholining piyoda yurishi uchun qulayliklar yaratish maqsadida barcha ko‘chalarda o‘rnatilgan svetoforlarning ruxsat beruvchi chiroqlari vaqtlari oralig‘ini xalqaro standartlar asosida qayta ko‘rib chiqadi.

Qayd etilishicha, vazirlik piyodalar o‘tish yo‘laklarida, shu jumladan, tartibga solinmagan serqatnov piyodalar o‘tish yo‘llarida maxsus yo‘lchiroq (svetofor)larni (maxsus tugmachalar orqali boshqariladigan) o‘rnatilishini, o‘tish joylarini (zebra) xalqaro tajribadan kelib chiqib innovatsion yondashuv asosida tashkil etilishini ta’minlaydi.

Belgilanishicha:

• svetofor chiroqlarining vaqtlar oralig‘ini belgilashda piyodalar uchun ajratilgan vaqtni ustuvor etib belgilash;
• avtomobil harakati yuqori bo‘lgan va katta yo‘l kesishmalarida yerosti yoki yerusti o‘tish joylarini tashkil etilishi majburiy hisoblanadi.

Bunda, aholi yurishi uchun mo‘ljallangan yo‘laklarda to‘siqlar, noqonuniy qurilish inshootlari, avtoturargohlar joylashtirilishini oldini olishga, shuningdek, ularni yorug‘, uzluksiz va ravon qurilishiga qat’iy e’tibor qaratiladi.