Sankt-Peterburgdagi Pokrovskiy kasalxonasi yaqinida tez yordam mashinalarining to‘planib qolishini “Rospotrebnadzor”ning bitta tekshiruv xonasida faqat bir nafar bemor bo‘lishi lozimligi to‘g‘risidagi normalari bilan tushuntirish mumkin. Bu haqda shahar Sog‘liqni saqlash qo‘mitasi matbuot kotibi Olga Ryabininaga tayanib, “RBK” xabar berdi.
Uning so‘zlariga ko‘ra, ushbu kasalxona koronavirusga chalingan bemorlarni qabul qiluvchi eng ko‘p koyka-o‘rinlarga ega yirik tibbiyot muassasalaridan biri hisoblanadi. “Hozirda 543 ta koyka mavjud, kuniga 45-50 bemorga javob berilyapti, yana xuddi shuncha odam qabul qilinyapti. Shifoxona avval boshidan yuqumli kasalliklarga mo‘ljallanmagan, shu sabab bemorlar tekshiruv xonasi orqali qabul qilinmoqda”, — deydi Ryabinina.
Matbuot kotibining ta’kidlashicha, “Rospotrebnadzor” normalariga ko‘ra, tekshiruv xonasida faqat bir kishi bo‘lishi mumkin, shu sababli bemorlarning qabulxonada to‘planishiga yo‘l qo‘yib bo‘lmaydi.
“Tabiiyki, bemorlar kutish vaqtida tez yordam mashinasi ichida bo‘ladi. Shu sababli, afsuski, tez yordamlar navbati pandemiya belgisiga aylanib qoldi. Ertaga bir soatda barcha navbatlar yo‘q bo‘lib ketadi, deya olmaymiz”, — deydi matbuot kotibi.
Rossiya koronavirusga qarshi kurash tezkor shtabi ma’lumotlarga ko‘ra, Sankt-Peterburgda koronavirus bilan kasallanganlar soni 41,5 ming kishiga yetgan, ularning 28,2 mingi sog‘aygan, 2839 kishi virus qurboniga aylangan.
Avvalroq “Rospotrebnadzor” koronavirusning aniqlangan mutatsiyalari haqida ma’lumot bergandi. Ta’kidlanishicha, ushbu mutatsiyalar 2020-yilning yanvar oyidan mart oyi oralig‘ida paydo bo‘lgan, keyinchalik virus genomida keng tarqalgan mutatsiyalar aniqlanmagan.
Izoh (0)