Monopoliyaga qarshi kurash qo‘mitasi intellektual mulk huquqlarini buzgan tadbirkorlik subyektlari ro‘yxatini e’lon qildi

Monopoliyaga qarshi kurash qo‘mitasi 2020-yilda intellektual mulk huquqlarini buzgan 30 ta tadbirkorlik subyektlarining ro‘yxatini e’lon qildi. Qonunbuzarlar Snickers, Mars, Zebra, Hydrolife, Kanefron va boshqa brendlarning ko‘rinishiga taqlid qilgan.

Ma’lum qilinishicha, ro‘yxatda Raqobat to‘g‘risidagi qonunning 13-moddasini (insofsiz raqobatni taqiqlash) buzgan 30 ta ishlab chiqaruvchi mavjud. Ro‘yxatda keltirilgan tadbirkorlik subyektlari mahsulotning tashqi dizayni, shakli, nomi, markirovkasi, yorlig‘i, qadoqlanishi, rang sxemasi, savdo belgisi, reklama materiallarini nusxalash yoki (raqib) kompaniyaning mahsulotini individualizatsiya qiladigan boshqa elementlarni takrorlash orqali mahsulotga taqlid qilgan kompaniyalar keltirib o‘tilgan.

Qonunga muvofiq, mahsulotiga taqlid qilingan brendlar qatoriga Snickers va Mars shokolad barlari, “Shedroye leto” margarini, O‘zbekistondan quritilgan mevalarni sotadigan Garden Cells, Colgate tish pastasi, Zebra shirinliklari, Kanferon, Ampisul, Colostrum, Festal, Hydrolife, Family mineral suvlari, Akfa Plast va boshqalar qayd etilgan.

Raqobat to‘g‘risidagi qonun buzilgan taqdirda, Monopoliyaga qarshi qo‘mita raqobat to‘g‘risidagi qonunni buzish faktini aniqlash va tegishli qonuniy choralar ko‘rish, shuningdek, qonunni buzgan tadbirkorga nisbatan ish yuritishni tugatish to‘g‘risida qaror qabul qilishi mumkin.

Raqobat to‘g‘risidagi qonunni buzganlik to‘g‘risidagi ishlarni qo‘zg‘atish va ko‘rib chiqish uchun asoslar monopoliyaga qarshi organning o‘z tekshiruvlari va tadqiqotlari materiallari, yuridik va jismoniy shaxslarning, davlat organlari, mahalliy davlat hokimiyati organlarining bayonotlari va tegishli organlarning taqdimnomalari hisoblanadi.

Avvalroq qo‘mita tomonidan O‘zbekistonda dorilar tanqisligi va narxi oshirilgani yuzasidan 3000 dan ortiq dorixonalarga ogohlantirish berilgani ma’lum qilingandi.