BAAdan O‘zbekistonga muntazam aviaqatnovlarni amalga oshirish uchun “AIR ARABIA Abu-Dabi LLC” ruxsatnoma oldi, deya xabar beradi Transport vazirligi.
Qayd etilishicha, O‘zbekiston va Birlashgan Arab Amirliklari hukumatlari o‘rtasida imzolangan havo qatnovi to‘g‘risidagi bitim asosida “O‘zaviatsiya” agentligi tomonidan “AIR ARABIA Abu-Dabi LLC” kompaniyasiga Abu-Dabi–Toshkent–Abu-Dabi yo‘nalishlarida muntazam parvozlarni amalga oshirish uchun 2020-yil 9-sentabrda 3-K sonli foydalanish ruxsatnomasi berilgan.
Aviakompaniya mazkur yo‘nalishda O‘zbekistonga parvozlarni Airbus-320-214 havo kemalarida amalga oshirishini ma’lum qildi.
Muntazam parvozlar qachondan boshlab amalga oshirilishi haqida ma’lumot berilmagan.
Avvalroq Uzbekistan Airways 4-sentabrdan beshta davlat bilan muntazam xalqaro aviaparvozlarni tiklashi haqida xabar berilgandi. Unda BAAdan tashqari Qozog‘iston, Qirg‘iziston, Turkiya va Germaniya qayd etilgan.
Izoh (0)