Mutaxassislar COVID-19 bilan kasallanganlar sog‘aygandan keyin boshqalarga xavf tug‘dirishi mumkinligi haqida ma’lumotga ega emas. “RBK”ning xabar berishicha, bu haqda “Rospotrebnadzor” markaziy ilmiy-tadqiqot epidemiologiya instituti klinik va analitik ishlar bo‘yicha direktor o‘rinbosari Natalya Pshenichnaya ma’lum qilgan.
“Koronavirus infeksiyasidan sog‘ayib chiqqan odam boshqalar uchun xavfli bo‘lishi mumkinligi to‘g‘risida ma’lumotlar jahon ilm-fanida hozircha yo‘q”, — degan u.
Pshenichnayaning so‘zlariga ko‘ra, sog‘aygan kishi bir muncha vaqt virus ajratishi mumkin, ammo u tirik emas va boshqa organizmda ko‘paya olmaydi. Bunday holatlarda koronavirusga topshirilgan tahlil natijalarining ijobiy chiqishi test tizimining infeksiya genetik materialiga reaksiyasini ko‘rsatadi. Mutaxassis bu borada qo‘shimcha tadqiqotlar o‘tkazish zarurligini ta’kidlagan.
Xabarda aytilishicha, 15-sentabr kuni “Rospotrebnadzor” rahbari Anna Popova COVID-19 bilan kasallanib, davolanib chiqqan odam atrofdagilar uchun yana 90 kun davomida xavf tug‘dirishi mumkinligini ma’lum qilgan.
Bu virus bilan kasallangan odam organizmi tuzalganidan keyin ham ma’lum vaqt SARS-CoV-2 virusini chiqarishda davom etishi bilan izohlanadi.
Popovaning aytishicha, bunda virus tashuvchida hech qanday alomatlar kuzatilmasligi mumkin. “Odamda hech qanday simptomlar yo‘q, qoni va barcha ko‘rsatkichlari yaxshi, lekin burun bo‘shlig‘idan virus ajralib chiqadi”, — degan u.
Izoh (0)