O‘zbekistonda 5-sentabrdan “marshrutkalar” faoliyatiga ruxsat etiladi

O‘zbekistonda karantin talablarini qisqartirish maqsadida Respublika maxsus komissiyasining navbatdagi qarori bilan 2020-yil 5-sentabrdan boshlab yo‘nalishli taksida (“marshrutka”) yo‘lovchi tashish faoliyatiga ruxsat beriladi.

Maxsus komissiya qaroriga ko‘ra Damas yengil avtomobilida yo‘lovchi tashishga yo‘l qo‘yilmaydi. Bunda ushbu transport vositalarida quyidagi sanitariya talablariga rioya etish talab qilinadi:

• yo‘nalishli taksi faoliyati davomida karantin qoidalariga rioya etgan holda har qatnovga chiqishdan oldin haydovchilarning tana harorati pirometrlarda o‘lchanib, 37 daraja va undan yuqori bo‘lgan holatda ularning transport vositasini boshqarishiga yo‘l qo‘ymaslik, ularning tibbiy niqob va qo‘lqopda bo‘lishini ta’minlash;
• yo‘nalishli taksida yo‘lovchilarning tibbiy niqobda bo‘lishi lozimligi, tibbiy niqob bo‘lmagan holatda ularning transport vositasiga chiqishiga yo‘l qo‘ymaslik;
• transport vositasi doimiy ravishda har qatnovga chiqishdan oldin, shu jumladan, har bir o‘rindiqni to‘liq dezinfeksiyadan o‘tkazilishini ta’minlash.