2020-yil 20-avgust kuni “Hududiy elektr tarmoqlari” AJ tomonidan Toshkentda Elektr energiyasini hisobga olishni avtomatlashtirish markazi foydalanishga topshirildi. Bu haqda Energetika vazirligi axborot xizmati xabar qildi.
Shu munosabat bilan tashkil qilingan marosimda nufuzli xalqaro tashkilotlar va energetika sohasi vakillari, mahalliy davlat idoralari, vazirlik va soha xodimlari ishtirok etgan. “Hududiy elektr tarmoqlari” AJ, Janubiy Koreyaning KT Corporation kompaniyasi hamda Osiyo taraqqiyot banki (OTB) hamkorligida amalga oshirilgan mazkur loyiha O‘zbekistonda energetika sohasini yanada rivojlantirishga, elektr energiya ta’minotida innovatsion texnologiya va yechimlardan foydalanishga qaratilgan.
2018-yil 23-oktabrdagi “Elektr energetikasi tarmog‘ini jadal rivojlantirish va moliyaviy barqarorligini ta’minlash chora-tadbirlari to‘g‘risida”gi Prezident qaroriga asosan, 2021-yil iyul oyiga qadar respublika bo‘ylab 7,4 milliondan ortiq iste’molchilarning barchasi elektr energiyasini hisobga olish va nazorat qilishning avtomatlashtirilgan tizimiga ulanishi ko‘zda tutilgan.
“Hududiy elektr tarmoqlari” AJ tomonidan “Elektr energiyasini hisobga olish va nazorat qilishning avtomatlashtirilgan tizimi (ASKUE)ni joriy etish ishlari izchillik bilan olib borilmoqda, deyiladi vazirlik xabarida.
Qayd etilishicha ayni kunlarda O‘zbekistonning 70 dan ortiq tuman va shaharlarida 3,6 milliondan ziyod iste’molchi xonadonlariga zamonaviy elektr hisoblagichlar o‘rnatilgan. Tahlil natijalari ushbu tizimning sinov loyihasini amalga oshirish davomida iste’molchilardan foydalanilgan elektr energiyasi uchun haq to‘lash darajasi 99 foizgacha o‘sganligini ko‘rsatgan.
Elektr energiyasini hisobga olishni avtomatlashtirish markazida respublika, viloyat, tuman (shahar) va mahallalar kesimida elektr energiyasi iste’molchilarining ma’lumotlari saqlanadi. Dasturiy ta’minot orqali elektr energiyasining soatlik, sutkalik, oylik va yillik balanslarini shakllantirish, ko‘p tariflik tizimida hisob-kitoblarni amalga oshirish imkoni mavjud.
Qarzdor iste’molchilarni to‘liq avtomatik ravishda o‘chirish va sarf qilingan elektr energiyasi uchun to‘lov amalga oshirilgandan so‘ng qayta yoqish, masofadan turib elektr hisoblagichlarni qayta dasturlash, iste’molchilar hisoblagichlaridan olingan ma’lumotlarni qayta ishlash hamda energetika tizimini nazorat qilish kabi vazifalarni amalga oshiradi.
Janubiy Koreyaning KT Corporation kompaniyasi tomonidan ushbu markazga Koreya, Xitoy, Singapur va AQSh kabi dunyoning yetakchi davlatlarida ishlab chiqarilgan server qurilmalari bilan ta’minlangan.
“Markazda o‘rnatiladigan dasturiy ta’minot 8 million iste’molchini ulashga mo‘ljallangan, kelgusida iste’molchilar sonini 20 millionga yetkazish imkoniyati mavjud.
Shuningdek, avvalgi dasturdan farqli ravishda ushbu dasturiy ta’minotga energoobyektlarni (nimstansiyalar, elektr stansiyalar) ham ulash imkoni yaratiladi. Bugungi kunda Buxoro, Samarqand va Jizzax viloyatlarida kichik markazlar qurilgan bo‘lib, Samarqand viloyatidagi server zaxira (Back-up) sifatida foydalanishga topshirildi”, – deyilgan Energetika vazirligining xabarida.
2019-yil 17-yanvarda Elektr energiyasini hisobga olishni avtomatlashtirish markazi tashkil etish bo‘yicha KT Corporation kompaniyasi hamda “O‘zbekenergo” AJ o‘rtasida qo‘shimcha kelishuv imzolangan. 2019-yil 6-noyabrida “Hududiy elektr tarmoqlari” AJ, KT Corporation hamda moliyaviy hamkor Osiyo taraqqiyot banki vakillari ishtirokida markaz binosining ichki qismini to‘liq rekonstruksiya qilish va server qurilmalarini o‘rnatish hamda hududlarda o‘rnatilayotgan elektr energiyasi hisoblagichlarini ma’lumotlarini qayta ishlash respublika yagona markaziga integratsiya qilish ishlariga start berilgan.
Avval Energetika vazirligi “Elektr energetika sohasidagi islohotlarni amalga oshirishda O‘zbekiston Respublikasi budjetini qo‘llab-quvvatlash uchun Osiyo taraqqiyot bankining 200 million AQSh dollari miqdoridagi kreditini jalb qilish to‘g‘risida”gi Vazirlar Mahkamasi qarori loyihasini muhokamaga qo‘ygani haqida xabar berilgandi.
Izoh (0)