Shavkat Mirziyoyev “O‘zavtosanoat” tomonidan tashkil qilingan tarmoqlararo kooperatsiya markazini borib ko‘rdi

Prezident Shavkat Mirziyoyev 21-avgust, juma kuni Bektemir tumaniga tashrifi doirasida Cooperation LAB tarmoqlararo kooperatsiyani rivojlantirish markaziga tashrif buyurdi. Bu haqda Prezident matbuot xizmati xabar berdi.

Ta’kidlanishicha, UzAuto Motors, SamAvto, JV MAN Auto — Uzbekistan, General Motors Powertrain Uzbekistan singari korxonalarda zamonaviy avtotransport va butlovchi qismlar ishlab chiqariladi. Shu bilan birga, ko‘plab ehtiyot qismlar xorijdan olib kelinmoqda. Bozor konyunkturasi va sanoat korxonalaridagi talabni tahlil qilish asosida yangi ehtiyot qismlarni o‘zlashirish choralari ko‘rilmoqda.

“O‘zavtosanoat” aksiyadorlik kompaniyasi tashabbusi bilan Bektemir tumanida Cooperation LAB tarmoqlararo kooperatsiyani rivojlantirish markazi shu maqsadda tashkil etilgan.

Loyiha qiymati 2 million dollar bo‘lgan bu markazda 50 kishi ish bilan ta’minlangan. Markaz g‘oyadan rastagacha tamoyili asosida avtomobilsozlik sohasida tarmoqlararo kooperatsiyani rivojlantirish, importni kamaytirish va mahalliylashtirish darajasini o‘stirishga mo‘ljallangan.

Hududdagi doimiy ishlaydigan ko‘rgazma pavilyonida “O‘zavtosanoat” va boshqa kompaniyalar tomonidan mamlakat avtobozoriga import qilinayotgan butlovchi detallar, xomashyo va materiallar namoyish qilinadi. Ular O‘zbekiston hududida, jumladan, mavjud korxonalarda ishlab chiqarish hajmlarini va ehtimoliy yo‘nalishlarni namoyish etish hamda import mahsulotlarni mahalliylashtirish uchun taqdim etiladi.

Davlat rahbari markazning kooperatsiya aloqalariga oid taqdimotlar bilan tanishdi. Malakali konstruktor va olimlarni jalb qilib, yangi texnikalarni o‘zlashtirish va buyurtma asosida yetkazib berish muhimligi ta’kidlandi.

Qayd etilishicha, mashinasozlik va elektrotexnika sohasida kooperatsiyani kengaytirishda yangi ochilgan Cooperation LAB markazi katta salohiyatga ega. Ushbu markaz tadbirkorlarga g‘oyadan tayyor mahsulotgacha injiniring, texnik yechimlar va bozor topish imkonini beradi.

Shu yerda viloyat hokimlariga tadbirkorlar guruhlarini shakllantirib, markaz bilan birga sanoat kooperatsiyasidagi yangi loyiha takliflarini ishlab chiqish topshirig‘i berildi.

Markazda ishlab chiqilgan takliflarni “loyihalar fabrikasi” orqali moliyalashtirish uchun tijorat banklari bilan hamkorlik o‘rnatish kerakligi aytildi.