O‘zbekistonda 13-avgust soat 23:30 dan 14-avgust soat 23:30 gacha koronavirus yuqtirib olish bilan bog‘liq 694 ta holat qayd etildi. Ketma-ket sakkizinchi kun kunlik kasallanish holati 700 ga yetmayapti. Yangi holatlardan so‘ng O‘zbekistonda koronavirusga chalinganlar soni 34017 nafarga yetdi.
Yangi kasallanish holatlari
Yangi kasallangan 694 kishining 667 nafari koronavirusga chalingan bemorlar bilan muloqotda bo‘lganligi sababli namuna olingan fuqarolar orasida aniqlangan:- Toshkent shahrida — 404 nafar;
- Toshkent viloyatida — 159 nafar;
- Samarqand viloyatida — 35 nafar;
- Qashqadaryo viloyatida — 14 nafar;
- Namangan viloyatida — 12 nafar;
- Xorazm viloyatida — 12 nafar;
- Sirdaryo viloyatida — 10 nafar;
- Andijon viloyatida — 8 nafar;
- Navoiy viloyatida — 6 nafar;
- Farg‘ona viloyatida — 5 nafar;
- Qoraqalpog‘iston Respublikasida — 2 nafar.
Kun davomida 11 ta hududda yangi kasallanish holati qayd etildi. 3-avgustdan beri birinchi marta bir kunda kasallik aniqlangan hududlar soni 10 tadan oshdi.
Toshkent shahrida 404 kishida koronavirus aniqlandi. Avgust oyining ortda qolgan 14 kuni ichida Toshkentda eng kam kasallik aniqlangan kunda (2-avgust) 325 kishida, eng ko‘p kasallik aniqlangan kunda (9-avgust) 509 kishida COVID-19 qayd etildi. 1—14-avgust oralig‘ida poytaxtda (karantin zonasida aniqlangan holatlarni hisobga olmasa) 5891 ta yangi holat aniqlandi. 15-avgustdan Toshkent shahridagi jamoat transportining barcha turlari, shu jumladan, Toshkent metropolitenining yerosti qismi hamda yo‘nalishli taksilar o‘z faoliyatini qayta tiklamoqda.
Toshkent viloyatida 159 kishida COVID-19 qayd etildi. Viloyatda 23-iyuldan boshlab har kuni kasallikka chalinish holatlari qayd etilmoqda, 26-iyuldan beri esa har kuni koronavirusga chalinganlar soni 100 nafardan oshmoqda (ikki marta 200 tadan ham oshdi). Avgust oyining 14 kuni ichida Toshkent viloyatida (karantin zonasida aniqlangan holatlarni hisobga olmasa) 2161 kishida koronavirus aniqlandi. Toshkent viloyati koronavirusga chalinganlar soni 5000 nafardan oshgan ikkinchi hudud bo‘ldi. Viloyatdagi kasallanganlarning umumiy soni 5156 nafarga teng.
Samarqand viloyatida 35 kishida koronavirus aniqlandi. Viloyatda avgust oyining o‘zida 454 kishida koronavirus qayd etildi. Solishtirish uchun, 4 ta hudud (Qoraqalpog‘iston, Jizzax, Xorazm, Farg‘ona)da epidemiya mavsumi boshidan buyon buncha holat qayd etilmagan. Hozirda Samarqandda koronavirusga chalinganlar soni 1392 nafarga yetdi.
Qashqadaryo viloyatida 14 kishida COVID-19 aniqlandi. Viloyatda avgust oyida 187 kishida koronavirus aniqlandi, bu Qashqadaryodagi jami kasallanish holatlarining 21 foiziga tengdir.
Namangan viloyatida 12 kishida koronavirus qayd etildi. Viloyatda avgust oyida 67 kishida koronavirus aniqlandi. Bu Namangan viloyatidagi jami kasallanish holatlarining 8 foiziga teng deganidir.
Xorazm viloyatida 12 kishida COVID-19 qayd etildi. Viloyatda 7-avgustdan beri endi kasallanish holati aniqlandi. Avgust oyi davomida viloyatda 59 ta yangi holat qayd etildi. Toshkent shahrida esa bu vaqt ichida deyarli 100 baravar ko‘p (5891 ta) kasallanish holati aniqlandi.
Sirdaryo viloyatida 10 kishida koronavirus aniqlandi. Sirdaryoda oxirgi 5 kun ichida har kuni yangi kasallanish holatlari qayd etilmoqda. Bu kunlarda kasallanganlar soni 10—15 nafar oralig‘ida bo‘ldi. 17-iyuldan boshlab SSV Sirdaryo viloyatining statistikasini Toshkentdan alohida berishni boshladi. O‘sha kungacha viloyatda kasallanganlar soni 213 nafarni tashkil etgan bo‘lsa, ortda qolgan 29 kun ichida Sirdaryo viloyatida koronavirusga chalinganlar soni 526 kishiga ko‘paydi va hozirda 739 nafarni tashkil etmoqda.
Andijon viloyatida 8 kishida koronavirus qayd etildi. Viloyatda so‘nggi 20 kun ichida faqat 8-avgust kuni yangi holatlar aniqlanmadi. Hozir Andijonda koronavirusga chalinganlar soni 1140 nafarga yetgan. Ushbu holatlarning 145 tasi avgust oyida qayd etildi.
Navoiy viloyatida 6 kishida COVID-19 aniqlandi. Viloyatda avgust oyida 58 kishida koronavirus qayd etildi, lekin ularning aksariyati sog‘ayishga ulgurgan. Hozirda viloyatda davolanayotgan bemorlar 29 nafarni tashkil etmoqda. Navoiyda koronavirusga chalinganlar orasida viloyat hokimi Qobul Tursunov ham bor. U Toshkentda davolanishni boshlaganiga 18 kun bo‘ldi.
Farg‘ona viloyatida 5 kishida koronavirus qayd etildi. Viloyatda 4 kun ichida birinchi marta yangi holatlar ro‘yxatga olindi. Farg‘onada koronavirusga chalinganlar soni 307 nafarga yetdi. Ushbu holatlarning 56 tasi avgustda aniqlandi.
Qoraqalpog‘iston Respublikasida 2 kishida koronavirus qayd etildi. Avgust oyida Qoraqalpog‘istonda jami 72 kishida koronavirus aniqlandi. Bu Respublikadagi jami kasallanish holatlarining 17 foiziga tengdir.
O‘lim holatlari va ahvoli og‘ir bemorlar
SSV kun davomida Toshkent shahrida 5 nafar bemor vafot etgani haqida xabar berdi. Ulardan 4 nafari erkak, 1 nafari ayoldir. Bir kun avval 4 ayol va 1 erkak vafot etgani haqida axborot berilgandi.Birinchi o‘lim. Shayxontohur tumanida yashagan 71 yoshli M.O. ismli erkak vafot etgan.
Ikkinchi o‘lim. Yakkasaroy tumanida yashagan 51 yoshli U.P. ismli erkak vafot etgan.
Uchinchi o‘lim. Olmazor tumanida yashagan 72 yoshli A.Ya. ismli erkak vafot etgan.
To‘rtinchi o‘lim. Yakkasaroy tumanida yashagan 36 yoshli F.R. ismli erkak vafot etgan.
Beshinchi o‘lim. Yunusobod tumanida yashagan 59 yoshli S.M. ismli ayol vafot etgan.
Hozirgacha Sog‘liqni saqlash vazirligi 221 kishining koronavirus asoratlaridan vafot etganini xabar berdi. “Daryo” hisobi bo‘yicha koronavirusga chalingach, vafot etganlar soni 230 nafarni tashkil etmoqda. Davlat xizmatlari agentligi 15-iyul kuni Navoiy viloyatidagi 61 yoshli xodimi Adhamjon Dehqonov, Madaniyat vazirligi esa 18-iyul kuni 32 yoshli xodimi Akmal Irisov koronavirus asoratlaridan vafot etgani, Olmaliq shahri hokimligi 9 va 15-iyul kunlari shahar shifoxonalarida vafot etgan ikki ayolda koronavirus tasdiqlangani haqida xabar bergan. Shuningdek, 19-iyul kuni Chilonzor tumani Sanitariya-epidemiologik osoyishtalik markazi bakteriologiya laboratoriyasi mudiri 62 yoshli Marhabo Ahmedova, 22-iyulda bosh prokurorning sobiq o‘rinbosari, Qoraqalpog‘iston prokuraturasida bo‘lim boshlig‘i bo‘lib ishlayotgan 66 yoshli Hakimbay Xalimov koronavirus asoratlaridan vafot etgani xabar qilingan. 31-iyul kuni Jinoyat ishlari bo‘yicha Toshkent viloyat sudi sudyasi, 53 yoshli Xayriddin Shermuhamedov, 1-avgust kuni Toyloq tumani prokurori Farhod Abduxoliqov, Innovatsion sog‘liqni saqlash milliy palatasi “Buyuk kelajak” kengashi eksperti Sanjar Jalolov 58 yoshida vafot etgani xabar berildi. Biroq ushbu to‘qqiz holat haqida SSV tomonidan ayni vaqtgacha axborot berilmagan.
Ayni paytda koronavirus infeksiyasidan davolanayotgan 5 135 nafar bemordan 1 289 nafari og‘ir, 362 nafari esa o‘ta og‘ir ahvolda.
Kasallikdan davolanish
14-avgust kuni O‘zbekistonning 10 ta hududida koronavirus infeksiyasidan davolanayotgan bemorlardan 1448 nafari sog‘aydi. Ketma-ket to‘rtinchi kun davolanganlar soni 1000 nafardan ortiq bo‘lmoqda. 12-avgust kuni 1569 nafar bemor sog‘ayib, rekord o‘rnatilgandi.Yangi tuzalganlarning
- 1104 nafari Toshkent shahrida;
- 256 nafari Toshkent viloyatida;
- 22 nafari Qashqadaryo viloyatida;
- 21 nafari Samarqand viloyatida;
- 17 nafari Sirdaryo viloyatida;
- 10 nafari Andijon viloyatida;
- 9 nafari Namangan viloyatida;
- 5 nafar Xorazm viloyatida;
- 2 nafari Navoiy viloyatida;
- 2 nafari Farg‘ona viloyatida kasallikdan forig‘ bo‘ldi.
Ma’lumot uchun, O‘zbekistonda koronavirus epidemiyasi sabab sog‘liqni saqlash tizimiga tushayotgan yuklamani bir qadar yengillatish maqsadida 5-iyuldan boshlab koronavirus infeksiyasi alomatsiz kechayotgan bemorlarga uy sharoitida davolanishga ruxsat berilgan, ushbu yo‘nalishda yo‘riqnoma va eslatmalar ham e’lon qilingan.
Biroq Sog‘liqni saqlash vazirligi koronavirusga chalinganlarga doir axborotlarida yangi bemorlarning qanchasida kasallik alomatsiz (simptomsiz) kechayotganiga aniqlik kiritmayapti, shu boisdan ayni vaqtda koronavirusdan davolanayotgan bemorlarning qanchasi kasalxonalarda qolayotgani, qanchasi uy sharoitida davolanayotgani ma’lum emas.
Hozirda kasallik qayd etilgan jami 34 017 nafar bemordan 28 661 nafari sog‘ayib, davolanish ko‘rsatkichi 84 foizni tashkil etmoqda. Bir kun avval davolanish ko‘rsatkichi 82 foizga yetib, yozning eng yaxshi natijasi qayd etilgandi. Endi esa epidemiya mavsumi davomidagi eng yaxshi natija qayd etilib, yangi rekord o‘rnatildi. 82 foizlik ko‘rsatkich may oyida ham 3 marta takrorlangan, biroq undan yuqori ko‘rsatkichga hech qachon chiqilmagandi.
Sog‘liqni saqlash vazirligi ma’lumotlari bo‘yicha ayni paytda 5135 nafar bemor COVID-19’dan davolanmoqda. 29-iyul kuni bemorlar soni 9500 dan ortiq edi. 30-iyuldan boshlab davolanayotgan bemorlar soni kamaya boshladi. Ayni paytda davolanayotgan bemorlar soni 12-iyul kunidagi bemorlar soniga (o‘sha kuni 5085 nafar bemor davolanayotgandi) yaqinlashib qoldi.
Hozirda eng ko‘p bemor Toshkent shahrida davolanmoqda — 3850 nafar. Farg‘onada 5, Jizzaxda 9, Navoiyda 29, Qashqadaryoda 32, Xorazmda 33, Surxondaryoda 34, Qoraqalpog‘istonda 37, Namanganda 38, Andijonda 47, Sirdaryoda 53, Buxoroda 77, Samarqandda 101 va Toshkent viloyatida 790 nafar bemor qoldi.
Toshkent shahrida ketma-ket uchinchi kun koronavirusdan sog‘ayganlar 1100 dan oshgan bo‘lsa, Toshkent viloyatida 7-kun ketma-ket tuzalganlar soni 200 dan ortiq bo‘lmoqda. Ikkala hududda ham koronavirusdan davolanayotganlar soni 17-iyuldan beri minimumga tushdi. O‘sha kuni SSV Toshkent shahri, Toshkent va Sirdaryo viloyatlarining statistikalarini alohida bera boshlagandi. 17-iyul holatiga ko‘ra, Toshkent shahrida koronavirusdan davolanayotganlar 4654 nafarni, Toshkent viloyatida 884 nafarni tashkil etayotgandi.
Izoh (0)