Qarshi shahrida yagona bo‘lgan nodavlat televideniye — Nasaf TV Qarshi shahar hokimligi mas’ullari sabab yersiz, boshpanasiz qolmoqda. Bu haqda “Daryo”ga shikoyat qilgan televideniye direktori, “Qarshi teleradiokanali” MChJ raisi Dilnoza Mamadaliyevaning aytishicha, shahar hokimligi televideniye uchun bino qurish uchun berilgan yerni endilikda tadbirkorga olib bergan.
“Qarshi shahar hokimligi 2011-yil 27-yanvar kuni Nasaf TV hamda Nasaf FM radiosiga shaxsiy bino qurish uchun to‘lqinlarni efirga uzatishga qulay bo‘lgan Qarshi shahridagi yagona teleminora joylashgan 4-kichik tuman — Cho‘lquvar mahallasi hududidan 1700 kvadrat metr yer bergandi. Endilikda esa bizga berilgan yer tadbirkorga ham berilgan bo‘lib chiqmoqda. Yer berib yuborilgachgina bundan xabar topyapmiz”, — deydi televideniye direktori Dilnoza Mamadaliyeva.
Ma’lum bo‘lishicha, shahar televideniyesi qurilish uchun bankdan kredit ololmagani bois ajratib berilgan yerda qurilish ishlarini bajarolmagan.
“O‘z vaqtida bankdan kredit ololmaganimiz va iqtisodiy ahvolimiz imkon bermagani uchun qurilish ishlarini bajarolmadik. Qurilish ishlari kechikayotgani haqida shahar hokimligiga ma’lum qilib, qaror muddatini uzaytirib berishlarini so‘radik. Ammo bizning ahvolimizdan foydalangan amaldagi mas’ullar yerni imi-jimida tadbirkorga berib yuborishgani ma’lum bo‘ldi”, — deydi Dilnoza Mamadaliyeva.
Televideniye jurnalisti, “Sevimli” kanalining viloyatdagi muxbiri Shavkat Aminovning ta’kidlashicha, hamkasblari bir necha yildan beri ijarada turib faoliyat yuritishga majbur.
“Shaharda atigi bitta nodavlat televideniye bor. Buni qarangki, shu kanal ham binosiz. Ijarama-ijara sarson bo‘lib yuribdi. O‘z shaxsiy binosiga ega bo‘lish maqsadida berilgan yer ham bugun tadbirkorga berib yuborilgan. Televideniye bu yerini yo‘qotsa, yana bir necha yil davomida ijarama-ijara yurishga majbur bo‘ladi”, — deydi Shavkat Aminov.
Ta’kidlanishicha, 27 yildan beri faoliyat yuritayotgan televideniye o‘tgan fursat davomida ko‘plab iste’dodlarni tarbiyalagan. Jamiyat hayotiga oid dolzarb mavzularni ko‘tarib, aholi hayotidagi muammolarning yechim topishida ko‘maklashgan.
Televideniye mas’ullarining ma’lumot berishicha, shahar hokimligi tomonidan berilgan 1700 kvadrat metr yer hokimning 2019-yil 14-maydagi qarori bilan “Muborak ekspress qurilish” MChJga ko‘p qavatli uy-joy qurish uchun berilgan.
“Shahar hokimligi mas’ullari shu darajada ayyorki, biz 2019-yil 17-iyul kuni ularga murojaat qilib, qurilish ishlarimiz kechikayotgani sabab qaror muddatini uzaytirib berishni so‘ragandik. Ular shahar markazida bo‘sh yer borligini bilib qolishdi, shekilli, 2019-yil iyul oyida may oyi sanasi bilan qaror chiqarib, bizga berilgan yerni tadbirkorga berib yubordi. Holbuki, qaror muddatini uzaytirib berishni so‘rab hokimlikka murojaat qilganimizda hokimning o‘sha paytdagi o‘rinbosari Ulug‘bek Avazov barcha hujjatlarni taqdim qilishimiz, tez orada qaror muddatini uzaytirib berishlarini aytgandi”, — deydi Dilnoza Mamadaliyeva.
Qarshi shahar hokimining qurilish masalalari bo‘yicha o‘rinbosari ayni kunda davolanishda bo‘lgani uchun hokimlik xodimi — mazkur masalaga mas’ul Dilshod Jalolov bilan suhbatlashdik.
“Bu masalada hech kim aniq gap aytolmaydi. O‘sha paytda nima bo‘lgan, nima uchun bunaqa muammo kelib chiqyapti, bizga qorong‘i. Boisi bu ishlar bilan shug‘ullangan hokimlik xodimlari ayni kunda ishdan bo‘shab ketgan. Hozir biz faqat sud qarorida keltirilgan gaplarni aytishimiz mumkin”, — deydi Dilshod Jalolov.
Aniqlanishicha, Qarshi shahar hokimining televideniyega berilgan yerni “Muborak ekspress qurilish” MChJga berish haqidagi 2019-yil 14-maydagi qarori sud tomonidan haqiqiy emas deb topilgach, shahar hokimligi 2019-yil 16-dekabr kuni televideniyega 2011-yil berilgan yerni hokimlik zaxira fondiga qaytarish haqida qaror chiqargan. 2020-yil 10-yanvar kuni esa yerni “Muborak ekspress qurilish” MChJga berish haqida qaror imzolangan. Shu-shu televideniyega berilgan yer tadbirkorga berib yuborilgan.
Qarshi shahar televideniyesi mas’ullari esa shahar hokimining xatti-harakatidan norozi bo‘lib, sudga murojaat qilgan va hokimning 2019-yil 16-dekabr hamda 2020-yil 10-yanvardagi qarorlarini haqiqiy emas, deb topishni so‘ragan.
Mazkur ishni ko‘rib chiqqan Qarshi shahar ma’muriy sudi televideniye da’vosini rad etgach, jurnalistlar shahar ma’muriy sudi qaroridan norozi bo‘lib, viloyat ma’muriy sudiga kassatsiya tartibida shikoyat kiritgan. Taassufki, viloyat sudyalari ham televideniye da’vosini rad qilgan.
“Har ikkala sud ham bizning da’vomizni rad etdi. Endilikda biz yana yersiz, boshpanasiz qolyapmiz”, — deydi televideniye jurnalistlari.
Televideniye direktori Dilnoza Mamadaliyevaning qo‘shimcha qilishicha, ular mazkur masalada viloyat rahbari Zoir Mirzayevga ham murojaat qilib, og‘ir ahvolda qolishganini, televideniye uchun bino zarurligini ta’kidlab, shahar televideniyesiga yordam berilishini iltimos qilgan.
“Shu paytgacha viloyat hokimligidan ham biror-bir javob olmadik. Viloyat rahbari bizning muammoga e’tibor qaratmayapti”, — deydi televideniye xodimlari.
Eslatib o‘tamiz, avvalroq televideniye hamda hokimlik o‘rtasidagi yer mojarosini ko‘rib chiqayotgan sud ishini yoritishga kelgan “Sevimli” telekanali muxbiriga viloyat ma’muriy sudi tomonidan xususiy ajrim chiqarilgani, biroq sudyalar aytgan gapidan qaytib qolishgani haqida xabar berilgandi.
Afsuski, mazkur holatga Oliy sud ham e’tibor qaratmadi.
Tez orada viloyat hokimi Zoir Mirzayevning televideniye muammosiga, Oliy sudning esa aytgan gapidan qaytadigan sudyalar masalasiga e’tibor qaratishidan umidvormiz.
Izoh (0)