Samarqand aeroportining rekonstruksiyasi uchun 62 million AQSh dollari ajratiladi. Bu haqda O‘zbekiston 24 telekanali informatsion dasturida xabar berildi.
Ma’lum qilinishicha, rekonstruksiya ishlari yakunlanganidan so‘ng aeroport o‘z o‘tkazish qobiliyatini soatiga 600 dan 1200 yo‘lovchiga oshirishi mumkin. 22 ta havo kema uchun to‘xtash va uchish-qo‘nish yo‘lagi qurilishi ham yakunlanmoqda.
Aeroport tashqi ko‘rinishi noodatiy tarzda qad rostlashi va shaharning yana bir tashrif qog‘ozi bo‘lishi mo‘ljallangan. Unga ko‘ra, aeroport kitob shaklida bo‘ladi va ustki qismida yulduzlarning joylashuvi aks etadi.
Loyihani Turkiyaning Kiklop va mahalliy Primetime Group amalga oshirishadi. Pudratchi vazifasini esa Enter Engineering kompaniyasi bajaradi.
“Hozirgi kunda obyektda 245 nafar quruvchi barcha sanitariya-gigiyena talablariga amal qilgan holda ishlamoqda. Ish jadvalga muvofiq rivojlanmoqda. Bugungi kunga kelib poydevorni 100 foiz tugatdik. Obyekt topshirilgandan keyin xalqaro aeroport yiliga 1,4 million yo‘lovchini qabul qila oladi, bu esa Samarqandda turizmni rivojlantirishga ijobiy ta’sir ko‘rsatadi”, ― dedi terminal qurilishi direktori Bahrom Usmonov.
Aeroportni 2021-yilgacha foydalanishga topshirish ko‘zda tutilgan.
Samarqand aeroporti rekonstruksiya ishlari tugagandan so‘ng “Ochiq osmon” rejimi yo‘lga qo‘yiladi, deyiladi xabarda.
Avvalroq O‘zbekistonning barcha hududiy aeroportlarida 2020-yilning 1-avgustidan “Ochiq osmon” rejimi joriy etilishi haqida xabar berilgan edi.