AQSh prezidenti Donald Tramp mamlakatda koronavirus chekina boshlaganini ma’lum qildi. Bu haqda u Oq uyda bo‘lib o‘tgan matbuot anjumani vaqtida ta’kidlagan.

Foto: Reuters

“Biz sezilarli darajada progress amalga oshirilganini ko‘ryapmiz”, — deydi Tramp. ABC News’ning yozishicha, AQShning 15 shtatida COVID-19 bilan kasallanish holatlari hamon o‘smoqda.

Bundan tashqari, Trampning bayonoti koronavirus bo‘yicha ishchi guruh koordinatori Debora Birksning mamlakatda COVID-19 infeksiyasining “favqulodda yuqori darajada tarqalishi” hamda Qo‘shma Shtatlarda pandemiyaning “yangi bosqichi” boshlanayotgani to‘g‘risida ogohlantirishidan bir kun o‘tib yangragan.

Amerika yetakchisi, shuningdek, matbuot anjumanida fuqarolarni niqob taqishga, qo‘llarni muntazam yuvish va ijtimoiy masofalanishga rioya qilishga chaqirgan.

Jons Hopkins universiteti ma’lumotlariga ko‘ra, AQShda hozirda koronavirus bilan kasallanganlar soni 4,7 million kishidan oshgan, 155,4 mingdan ortiq bemor COVID-19 qurboniga aylangan. Mamlakat koronavirus bilan kasallanish va o‘lim holatlari bo‘yicha dunyoda birinchi o‘rinda ketmoqda.