Tesla va SpaceX asoschisi Ilon Mask Misrdagi piramidalar noma’lum sivilizatsiya tomonidan qurilgani to‘g‘risidagi nazariyani qo‘llab-quvvatladi. “Piramidalarni o‘zga sayyoraliklar qurgan, bu ochiq-oydin-ku”, — deb yozgan Mask o‘zining Twitter’dagi sahifasiga.
Shuningdek, Tesla asoschisi qadimgi Misr fir’avni Ramzes II qattiqqo‘l bo‘lganiga shama qilgan.
Tadbirkorga Misr xalqaro aloqalar vaziri Raniya al-Mashat javob qaytargan. U piramidalarga o‘zga sayyoraliklarning aloqasi bor yoki yo‘qligini to‘g‘ridan to‘g‘ri inkor etmagan. Buning o‘rniga vazir Maskni Misrga kelib, piramidalar qurilishiga oid ma’lumotlarni o‘rganish, shuningdek, piramida quruvchilarining qabrini tekshirishga taklif etgan.
Misrlik arxeolog Zaxi Havas esa Maskning o‘zga sayyoraliklar borasidagi gap-so‘zini “alahsirash” deb atagan. “Men piramidalarni qurgan quruvchilarning qabrlarini topganman va bu piramidani misrliklar qurganidan dalolat beradi hamda ular qul bo‘lmagan”, — deydi arxeolog.
Shundan so‘ng Mask piramidalarning qurilishi “mulohazali” tushuntirib berilgan BBC materiali havolasi bilan bo‘lishgan. Ushbu materialda boshqa narsalar qatori, piramida quruvchilarining qoldiqlarini o‘rganishda o‘zga sayyoraliklarning izlari topilmagani aytiladi.
Eslatib o‘tamiz, 2019-yilning sentabrida Ilon Mask to‘liq yig‘ilgan ilk Starship raketasi taqdimotida galaktikada o‘zga sayyoraliklar mavjud emasligini ma’lum qilgandi.
Izoh (0)