Qoraqalpog‘istonga Germaniyada ishlab chiqarilgan koronavirus testini tahlil qiluvchi ko‘chma uskuna olib kelindi

Innovatsion rivojlanish vazirligi tomonidan COVID-19 virusini aniqlovchi “Mini 8 Plus Real-Time PSR System” uskunasi va 1400 ta test tizimi Qoraqalpog‘iston Sanitariya-epidemiologiya farovonligi markaziga beg‘araz yordam sifatida topshirildi, deya xabar bermoqda “Yangi O‘zbekiston” nashri.

Qayd etilishicha, “Mini 8 Plus Real-Time PSR System” Germaniyada ishlab chiqarilgan bo‘lib, funksional jihatdan katta — standart apparatlardan farq qilmaydi. PZR (polimer zanjir reaksiyasi) asosida ishlovchi mazkur mobil molekulyar uskuna foydalanuvchilar uchun qulay bo‘lgan oddiy interfeys bilan jihozlangan.

Uskuna birdaniga 8 ta namunani tekshirish quvvatiga ega bo‘lib, aksariyat tijoriy reagentlarga mos keladi. Bundan tashqari, tizim avtomatik tarzda tanlangan elektron manzilga ma’lumotlarni yuborish imkoniyatiga ega. Shu bois laboratoriya xodimlari ish vaqtlaridan unumli foydalanadilar, mijozlar esa zudlik bilan kasallikka chalinganlari yoki chalinmaganliklari to‘g‘risida ma’lumot oladi.

Uskunaning sozlashga ehtiyoj yo‘qligi, yengil va kichik hajmli ekani bois uni bemalol laboratoriya ichida yoki boshqa joylarga ko‘chirib yurish mumkin. Olis hududlarda diagnostika ishlarida foydalanishga mo‘ljallangan mazkur uskuna avtonom rejimida ishlashga mo‘ljallangan bo‘lib, rozetka orqali ham, batareyalar orqali ham ishlaydi.

Ta’kidlanishicha, mazkur qurilma koronavirus va boshqa yuqumli kasalliklarni aniqlashdan tashqari genotiplash, ya’ni nasldan naslga o‘tadigan kasalliklarni topish, shuningdek, hujayradagi genlarning o‘zgarganlik darajasini tahlil qilish hamda oziq-ovqat mahsulotlarining xavfsizligini aniqlash imkonini beradi. Hatto, bu apparat yordamida, masalan, “mol go‘shti” deb yozilgan qadoqdagi kotletda tovuq go‘shtining bor-yo‘qligini yoki zararli kimyoviy moddalar ishlatilgan-ishlatilmaganini bilish mumkin.