COVID-19 inqirozi manzarasida, go‘yoki, uzoqdagi orolga qarab umidvor suzayotgan kemaga o‘xshaymiz. Kemadagi resurslarning tagi ko‘ringan, yo‘lovchilar holdan toygan. Harakatlarimiz faqat vaqtdan yutishga qaratilgan. Tezroq vaksinaga yetsak edi. Afsuski, koronavirusni eng ko‘p yuqtirish bu haftaga to‘g‘ri keldi.

31-iyul kuni 738 kishi virus yuqtirgan bo‘lsa, 1ғavgust kuni bu son 774 taga chiqdi. Bu hafta antirekordlaridir. Hozirgacha virusdan vafot etganlarning rasman qayd qilingan soni 160 nafarni qoraladi. Umumiy bemorlar soni 25 mingdan oshdi. Ta’kidlash lozimki, bular faqat tan olingan holatlardir. Shuningdek, noodatiy zotiljam ham fuqarolarimizning umriga zomin bo‘lmoqda. Biroq koronavirus oqibatida yuzaga keladigan o‘limlar statistikasi yangi tartibda yuritilishi mumkin. Bu haqda 30-iyuldagi brifingda aytildi.

2002-yildan beri Qoraqalpog‘iston Respublikasi Jo‘qorg‘i Kengesi raisi lavozimida ishlab kelayotgan Musa Yerniyazov 72 yoshida koronavirusdan vafot etdi. Musa Yerniyazov koronavirusga chalingani haqidagi xabarlar iyul oyi boshida paydo bo‘lgan, ammo Qoraqalpog‘iston rahbariyati bu xabarlarni qat’iy rad etgandi. Shavkat Mirziyoyev marhumni so‘nggi safarga kuzatish uchun Nukusga bordi. Musa Yerniyazov vafoti munosabati bilan tashkil etilgan ta’ziya marosimida nutq so‘zlab, uning nomi ko‘cha va xiyobonlarga berilishini bildirdi.

Musa Yerniyazov.

Foto: “Daryo”

Bu hafta, shuningdek, moliya vaziri o‘rinbosari lavozimini egallab kelgan Yorqin Tursunov 55 yoshida vafot etdi. “Kun.uz”ning yozishicha, vazir o‘rinbosari ham virus yuqtirishi oqibatida dunyodan o‘tgan.

Koronavirus infeksiyasi kishining lavozimiga qarab o‘tirgani yo‘q. Navoiy viloyati hokimi Qobul Tursunov koronavirus infeksiyasidan davolanmoqda. Buxoro viloyati hokimi vazifasini bajaruvchi Karim Kamolov koronavirusga chalingani tasdiqlangan. Buxoroning avvalgi hokimi va hozir bosh vazir o‘rinbosari O‘ktam Barnoyev va davlat bosh sanitariya inspektori Nurmat Otabekovda ham koronavirus aniqlangan. Ularning barchasi davolanmoqda. Sog‘liqni saqlash vaziri Alisher Shodmonov ham davolanmoqda, biroq uning shifoxonaga tushishi koronavirus bilan bog‘liq emas, balki kardiologik muolajalar olmoqda. Ilgari niqobda ko‘rinmagan prezident Shavkat Mirziyoyevning ham bu hafta niqob taqib yurgan suratlari tarqaldi.

Karantin ko‘plab oilalarning sillasini quritgani sir emas. O‘zbekistonda ehtiyojmand oilalarga jami 150 milliard so‘m moddiy yordam tarqatilishi aytildi. Avvalroq Qashqadaryoda 20 mingta ehtiyojmand oilaga bir million so‘mdan naqd pul tarqatilgan edi.

* * *

Garchi bu yangilik o‘z ortidan narxlar oshishini olib kelganligi uchun uncha quvonch uyg‘otmasa-da, bir yilda 1-2 marta amalga oshiriluvchi an’ana bo‘lganligi uchun dayjestimizga qo‘shdik. O‘zbekistonda 1-sentabrdan pensiyalar 10 foizga oshiriladi. Shunday qilib, kelasi oydan pensiyani hisoblashning bazaviy miqdori – oyiga 262 470 so‘m; eng kam yoshga doir pensiyalar – oyiga 513 350 so‘m; bolalikdan nogironligi bo‘lgan shaxslarga beriladigan nafaqa – oyiga 513 350 so‘m; zarur ish stajiga ega bo‘lmagan keksa yoshdagi va mehnatga layoqatsiz fuqarolarga beriladigan nafaqa – oyiga 315 030 so‘m etib belgilandi.

* * *

31-iyul kuni O‘zbekistonda Qurbon hayiti nishonlandi. Garchi qat’iy karantin sababli hayit namozi o‘qilmagan bo‘lsa-da, qurbonliklar qilib tarqatildi. Aytish lozimki, shu kuni harakatlanish taqiqlangan bo‘lsa ham, qurbonlik go‘shtlarini shahar bo‘ylab tarqatilishiga qarshiliklar deyarli bo‘lmadi. Shavkat Mirziyoyev O‘zbekiston xalqini Qurbon hayiti bilan tabrikladi. Alisher Usmonov Qurbon hayiti munosabati bilan O‘zbekistondagi tez tibbiy yordam xodimlari uchun 100 milliard so‘m taqdim etdi. Turkiya Qurbon hayiti munosabati bilan Sardoba toshqinida jabr ko‘rganlar uchun insonparvarlik yordami yubordi va 14 tonna hajmdagi bu yordam Sardoba tumani mutasaddilariga topshirildi.

Foto: Google Photos

* * *

Hafta tayinlovlari bilan tanishing.

O‘zbekiston axborot olamida o‘zgarish bo‘lishi kutilmoqda, biroq bu o‘zgarish qaysi tarafga ekanini hozircha aytish qiyin. O‘zbekiston Respublikasi Prezidenti administratsiyasi huzuridagi Axborot va ommaviy kommunikatsiyalar agentligiga Asadjon Xo‘jayev direktor etib tayinlandi. Xo‘jayev 2019-yilda O‘zbekiston Axborotlashtirish va telekommunikatsiyalar sohasida nazorat bo‘yicha davlat inspeksiyasining boshlig‘i etib tayinlangandi. U bunga qadar Axborot xavfsizligi va jamoat tartibini ta’minlashga ko‘maklashish markazi direktori va boshqa lavozimlarda ishlagan. AOKAni avval Komil Allamjonov boshqargan.

O‘zbekiston sog‘liqni saqlash vaziri Alisher Shodmonov Respublika ixtisoslashtirilgan kardiologiya ilmiy-amaliy tibbiyot markazida statsionar sharoitda davolanayotgani sababli bosh vazir o‘rinbosari Behzod Musayevga bir vaqtning o‘zida sog‘liqni saqlash vaziri vazifasini bajarish yuklandi.

O‘zbekiston Prezidentining fuqarolar huquqlarini himoya qilish va murojaatlar bilan ishlash masalalari bo‘yicha maslahatchisining birinchi o‘rinbosari lavozimida ishlab kelgan Ulug‘bek Muhammadiyev Davlat xizmatlari agentligi direktori etib tayinlandi.

* * *

Ikki minginchi yillarning mashhur xonandasi, O‘zbekistonda xizmat ko‘rsatgan artist Ruslan Sharipov 54 yoshida infarkt kasali sababli dunyodan o‘tdi. Asli samarqandlik Ruslan Sharipov “Bolalar”, “Bayt”, “Original”, “Sado”, “Eski shahar”, “O‘zbek sistem”, “Shahzod”, “al-Vakil”, “Setora”, “Yalla”, Bonu, Laylo, “Xo‘ja”, O‘zbekiston xalq artisti Yulduz Usmonova, Nargiz Zokirova, Ravshan Sobirov, Avaz Olimov, Dildora Niyozova singari ko‘plab musiqiy jamoa va san’atkorlarning kuy-qo‘shiqlari muallifi hisoblanadi.

* * *

Qirg‘izistondagi eng mashhur inson huquqlari himoyachilaridan biri Azimjon Asqarov bu hafta dunyodan o‘tdi. U 2010-yil 15-iyunda Qirg‘iziston janubidagi millatlararo ziddiyat tufayli ommaviy tartibsizliklarni tashkil qilganlik va militsiya xodimining o‘ldirilishida ishtirok etganlikda ayblanib, hibsga olingan edi. Sud Asqarovni bir umrga ozodlikdan mahrum qilgan, biroq u o‘z aybini tan olmagan edi.

Azimjon Asqarov.

Foto: Kloop

Marhumning vasiyati va rasmiylarning sa’y-harakati bilan Azimjon Asqarovning jasadi O‘zbekistonda dafn qilindi. Xalqaro tashkilotlar Azimjon Asqarovni ozod qilishni bir necha marta qirg‘iz hukumatiga tavsiya qilgan, biroq inobatga olinmagan edi.

* * *

Ba’zida shunday dahshatli jinoyatlar bo‘ladiki, xabarni oxirigacha o‘qishga odamning kuchi yetmaydi. Shunday mudhish hodisalardan biri Shahrisabzda sodir qilindi. Qashqadaryo viloyatining Shahrisabz shahrida yashovchi erkak shaxsiy avtomobilida o‘ziga qo‘shib uch nafar farzandi va turmush o‘rtog‘ini yoqib yubordi.

Voqea 2020-yilning 30-iyul kuni tungi 22:00 da Shahrisabz tumanida sodir bo‘lgan. Tuman IIB boshlig‘ining ma’lumot berishicha, oila boshlig‘i shaxsiy avtomobilida ketayotgan paytda turmush o‘rtog‘i bilan tortishib qoladi va avtomobil eshiklarini yopib, uch nafar farzandi, turmush o‘rtog‘i va o‘ziga benzin sepib, yoqib yuboradi. Buni shifoxonaga olib kelingan o‘g‘li bir muddat hushiga kelganda aytib bergan. Oilaning barcha a’zosi kuyish oqibatida vafot etgan.

Karantin qoidalariga rioya qiling. Niqob taqing. “Daryo”da va uyda qoling.