“Gidroksixloroxinning koronavirusga qarshi samarasi biror mukammal tadqiqotda isbotlanmagan” — Entoni Fauchi

AQSh bosh infeksionisti Entoni Fauchi 31-iyul kuni Kongressning Vakillar palatasida koronavirus inqirozi bo‘yicha tuzilgan komissiya oldida hisobot berdi. Eshituv davomida kongressmenlar undan gidroksixloroxin preparatini COVID-19 terapiyasida qo‘llash masalasi haqida ham so‘ragan, deb xabar bermoqda “Kun.uz”.

Entoni Fauchining ta’kidlashicha, yangi koronavirusdan davolashda gidroksixloroxinni qo‘llashning samaradorligi hozirgacha “oltin standart”ga asoslangan tadqiqotlarda biror marta isbotlanmagan. U, jumladan, Henri Ford gospitali tomonidan o‘tkazilgan va gidroksixloroxin COVID-19’dan o‘lim darajasini kamaytirishi haqida xulosa berilgan tadqiqot natijasini tan olmasligini qayd etib o‘tgan.

Fauchining so‘zlariga ko‘ra, ushbu tadqiqotni kamchiliklardan xoli emas. Xususan, mazkur klinik sinovlarda gidroksixloroxin berilgan bemorlar bir vaqtning o‘zida kortikosteroidlar ham qabul qilgan.

“Biz boshqa bir tadqiqotdan bilamizki, kortikosteroidlar kasallikning so‘nggi bosqichidagi bemorlar orasida o‘lim darajasini kamaytirishda yordam beradi”, — dedi mutaxassis. Uning qayd etishicha, bemorlarning tasodifiy tanlanishiga asoslangan va platsebo effekti nazoratga olingan tadqiqotlarning hech birida gidroksixloroxin koronavirusdan samarali ekani haqida xulosaga kelinmagan.

“Qachondir mana shu talablarga javob beruvchi tadqiqotlar gidroksixloroxinning samarasini tasdiqlasa, men birinchilar qatorida uni tan olib, doridan foydalanishni qo‘llab-quvvatlayman”, – dedi u.

Entoni Fauchi — AQSh Allergik va infeksion kasalliklar milliy instituti direktori, Oq uydagi koronavirusga qarshi kurash ishchi guruhi a’zosi. 79 yoshli mutaxassis pandemiya davrida dunyoning eng yetakchi ekspertlaridan biri sifatida nom qozongan. Koronavirus tarqalishining ilk davrlarida The New Yorker va The New York Times nashrlari Fauchini AQShdagi eng ishonchli tibbiyot olimlaridan biri sifatida e’tirof etgan edi.

COVID-19 terapiyasidagi ta’siri shubha ostida bo‘lgan gidroksixloroxin Jahon sog‘liqni saqlash tashkiloti tavsiyalaridan chiqarilgan, ko‘plab davlatlar koronavirus bemorlarini davolashda undan foydalanishni to‘xtatgan. Koronavirusni davolash bo‘yicha O‘zbekistonda amal qilayotgan so‘nggi protokoldan ham gidroksixloroxin olib tashlangan. Shunday bo‘lsa-da, preparat uyda davolanayotgan bemorlarga bepul beriladigan dorilar to‘plamida bor.