Qoraqalpog‘iston Respublikasi Jo‘qorg‘i Kengesi raisi, senator, O‘zbekiston Qahramoni Musa Yerniyazov 31-iyul kuni 73 yoshida vafot etgani haqida avval xabar berilgan edi. Prezident matbuot xizmatining xabar berishicha, Shavkat Mirziyoyev 1-avgust kuni Yerniyazovning ta’ziya marosimlarida qatnashish uchun Nukusga jo‘nab ketgan.
Ayni vaqtda Qoraqalpog‘iston nashrlarida Musa Yerniyazovni so‘nggi yo‘lga kuzatish jarayonidan foto va videolavhalar e’lon qilindi. Unda fuqarolar Qoraqalpog‘istonga 2002-yildan beri rahbarlik qilib kelgan amaldor bilan vidolashayotganini ko‘rish mumkin.
“Xalq bilan birga” kanali Nukusdagi hukumat binosi oldida ta’ziya marosimiga tayyorgarlik ko‘rish jarayonidan fotolavhalarni e’lon qilgan. Xuddi shu kanalda Yerniyazovning dafn marosimi jonli efirda namoyish etilishi haqida xabar berilgan edi, biroq bloger Shuhrat Saidahmadovning ma’lum qilishicha, “Qoraqalpog‘iston” telekanali marosimni jonli namoyish etishni rejalashtirmagan.
Qoraqalpog‘iston Jo‘qorg‘i Kengesi raisi, senator, O‘zbekiston qahramoni Musa Yerniyazov 31-iyul kuni vafot etgan edi.
Mavzuga doir: Shavkat Mirziyoyev O‘zbekiston Qahramoni Musa Yerniyozovning vafoti munosabati bilan hamdardlik yo‘lladi
Yerniyazovning koronavirusga chalingani 18-iyul kuni rasman e’lon qilingan, ahvoli barqaror ekani aytilgan edi (bungacha Qoraqalpog‘iston rahbariyati Yerniyazovning betobligi, kasallikdan davolanayotgani haqidagi xabarlarni muntazam rad etib kelgan). 30-iyul kuni Yerniyazovning ahvoli og‘ir deb baholanayotgani, u sun’iy nafas olish apparatiga ulangani ma’lum qilingan edi. QQR SSV axborotiga ko‘ra, Yerniyazov o‘tkir nafas va yurak qon-tomir yetishmovchiligi, o‘tkir respirator distress sindromidan, O‘zSSV axborotiga ko‘ra o‘tkir nafas va yurak qon-tomir yetishmovchiligidan vafot etgan.
Izoh (0)