Xitoyda so‘nggi sutkada koronavirus bilan kasallanish bo‘yicha 105 ta va kasallik belgisiz o‘tayotgan 21 ta holat aniqlandi, bemorlarning 13 nafari sog‘aydi, deb xabar bermoqda “RIA Novosti” Xitoy Sog‘liqni saqlash milliy komissiyasiga tayanib.

Foto: Reuters

Aniqlangan yangi kasallanish holatining 102 tasi mamlakatning o‘zida (96 tasi — Shinjon-Uyg‘ur avtonom hududida, Lyaonin provinsiyasida — 5 ta, Pekinda — 1 ta) qolgan 3 tasi chetdan yuqtirilgan.

Mamlakatda umumiy hisobda 84 165 kishi koronavirusga chalingan, ularning 78 957 nafari sog‘aygan, 4634 nafar bemor COVID-19 qurboniga aylangan. Kasalxonada 574 kishi davolanishda qolmoqda.

Bir kun avval Xitoyda koronavirus bilan kasallanish bo‘yicha 101 ta va kasallik belgisiz o‘tayotgan 27 ta holat aniqlangan edi.

Janubiy Koreyada esa sutka davomida 18 kishi koronavirusga chalingani qayd etilib, kasallanganlarning umumiy soni 14 269 nafarga yetdi, deb xabar beradi “RIA Novosti”.

Ushbu ko‘rsatkich 22-iyuldan buyon qayd etilgan minimumga aylandi.

Kasalliklar profilaktikasi va nazorati markazi (KCDC) ma’lumotlariga ko‘ra, yangi kasallanish holatining 7 tasi mamlakatning o‘zida, 11 tasi chetdan kirib kelgan.

O‘tgan bir sutka ichida shifoxonalarda 63 kishiga javob berilgan bo‘lib, Janubiy Koreyada hozirga qadar koronavirusdan sog‘ayganlar soni 13 132 kishiga yetgan (92 fozi). Pandemiya boshlanganidan buyon COVID-19’dan vafot etganlar soni esa 300 kishini tashkil etmoqda.