Vyetnamning Xoyan shahri koronavirus sabab sayyohlar uchun yopildi

Vyetnamdagi Xoyan port shahri tashrif buyuruvchilar uchun butunlay yopildi, deb xabar berdi mahalliy nashrga tayanib “RBK”.

Kuangnam provinsiyasi rahbariyati bunday qaror koronavirus tarqalishi xavfi bilan bog‘liqligini aytdi. Qayd etilishicha, allaqachon shaharda bo‘lgan sayyohlar mamlakat sog‘liqni saqlash vazirligining buyrug‘iga binoan maxsus deklaratsiyasini to‘ldirishi shart.

Shahardagi barcha madaniy tadbirlar, festivallar va sport musobaqalari vaqtincha bekor qilindi.

Avvalroq Vyetnam rasmiylari COVID-19 kasalligi Danang shahrida qayd etilganligini ma’lum qilgandi. Shu munosabat bilan shahardan 80 ming sayyohni evakuatsiya qilishga qaror qilindi.

So‘nggi kun davomida Danangda 11 ta yangi infeksiya holati aniqlandi. Ikki kishining ahvoli og‘ir, ular sun’iy nafas oldirish moslamalariga ulangan.

Shahar ma’murlari 28-iyul kuni  COVID-19 kasalligi aniqlagani sababli parvozlarni to‘xtatdi. Shuningdek, shaharda barcha avtobus va temiryo‘l xizmatlari to‘xtatildi.

Jons Hopkins universitetining 28-iyul kungi ma’lumotiga ko‘ra, Vyetnamda jami 431 ta kasallanish holati tasdiqlangan.