Surxondaryo viloyati hokimligi ijtimoiy tarmoqlarda hamda norasmiy axborot sahifalarida viloyati hokimi To‘ra Bobolovning vafot etganligi to‘g‘risida tarqalgan xabarlarni rad etdi.

“Vohadoshlarimizdan ayrim fuqarolar tomonidan koronavirus vahimasi fonida tarqatilayotgan bunday mish-mishlar, yolg‘on axborotlarga ishonmasliklaringizni so‘raymiz”, — deyiladi xabarda.

Shuningdek, Surxondaryo viloyati hokimligi matbuot xizmati ijtimoiy tarmoqlardagi guruh administratorlari hamda shaxsiy akkaunt egalaridan aholi orasida turli mish-mishlar paydo bo‘lishiga olib keladigan bu mazmundagi yolg‘on ma’lumotlarni tarqatish qonun oldida javobgarlikni keltirib chiqarishini eslatib o‘tgan.

Biroq ko‘p o‘tmay hokimlik matbuot xizmati To‘ra Bobolov to‘g‘risida chiqargan xabarini o‘chirib tashlab, o‘rniga yangi xabar chiqargan. Unda viloyat hokimining ahvoli yaxshi ekanligi, yaqin kunlarda ish faoliyatini davom ettirishi qo‘shimcha qilingan.

“24-iyul kuni soat 9:00 holatiga ko‘ra, Surxondaryo viloyati hokimi To‘ra Bobolovning holati yaxshi. Davolash taktikasi Jahon sog‘liqni saqlash tashkiloti tomonidan ishlab chiqilgan standartlar asosida olib borilmoqda. Surxondaryo viloyati hokimi kasallikdan to‘liq tuzalib, yaqin kunlarda ish faoliyatini davom ettiradi”, — deyiladi hokimlik matbuot xizmati xabarida.

Eslatib o‘tamiz, Sog‘liqni saqlash vazirligi 18-iyul kuni Surxondaryo viloyati hokimi To‘ra Bobolov koronavirusga chalingani, Toshkent shahrida kasallikdan davolanayotgani, ahvoli barqaror ekanini ma’lum qilgandi.