“Shaxtyor”ni 12 yil boshqargan Mircha Luchesku “Dinamo Kiyev”ga bosh murabbiy bo‘ldi

Ruminiyalik mutaxassis Mircha Luchesku Kiyevning “Dinamo” klubi bosh murabbiyiga aylandi. Bu haqda klub rasmiy saytida ma’lum qilindi.

“Dinamo” va Luchesku o‘rtasidagi bitim tafsilotlari ochiqlanmagan.

Qizig‘i shundaki, Luchesku 2004—2016-yillar mobaynida “Dinamo”ning azaliy raqibi “Shaxtyor”ni boshqargan.

Mazkur tayinlov ko‘plab kiyevlik muxlislar noroziligiga sabab bo‘ldi.

74 yoshli mutaxassis o‘z vaqtida “Breshiya”, “Inter”, “Galatasaroy”, “Beshiktosh” va “Zenit” kabi nomdor klublarda ishlagan. Shuningdek, Mircha Ruminiya va Turkiya terma jamoalarini ham boshqargan.

“Dinamo” 2019/20-yilgi mavsum yakunlariga ko‘ra chempionatda 2-o‘rinni oldi va Ukraina Kubogini qo‘lga kiritdi. Avvalroq klub bosh murabbiyi Aleksey Mixaylichenko va uning shtabi iste’foga chiqarilgandi.