Britaniyalik yozuvchi o‘zi yozgan kitob bestsellerlar ro‘yxatiga kirishi uchun uning 400 nusxasini sotib oldi

Britaniyalik yozuvchi Mark Douson o‘zi yozgan detektiv Sunday Times gazetasining Top-10 bestsellerlar qatoriga kirishi uchun kitobning 400 nusxasini xarid qildi. Xaridor kim ekanligi ma’lum bo‘lgach, kitob nufuzli ro‘yxatdan chiqarib tashlangan, deb yozadi The Guardian.

Douson o‘zining The Cleaner nomli detektivini yetti yil oldin yozgan.

Muallifning so‘zlariga ko‘ra, u o‘z asari xaridorgir kitoblar orasida 13-o‘rinda ekanligini ko‘rgach, shu kabi yo‘l tutishga qaror qilgan.

Douson muxlislariga romani o‘zining qo‘lidan sotib olishni taklif etgan, ular esa rozi bo‘lgan. Shundan so‘ng, erkak 3,6 ming funtlik kitob buyurtma qilgan. Bu kabi nayrang foyda bergan va britaniyalikning kitobi bestsellerlar ro‘yxatida 13-o‘rindan 8-o‘ringa ko‘tarilib olgan.

Biroq bu kabi yo‘l reyting mualliflariga yoqmagan. Nashrning ta’kidlashicha, ular ushbu 400 nusxa kitobni hisobga olmagan.

Britaniyalik yozuvchining o‘zi esa, halol o‘yin olib borgani, shunchaki kitobining savdosini tezlashtirganini ma’lum qilgan. Uning asarlari hozirda tez-tez Yevropa, AQSh va Avstraliyadagi o‘quvchilarga yuborilmoqda.