Qozog‘iston O‘zbekistonga oziq-ovqat mahsulotlaridan iborat insonparvarlik yordami jo‘natadi

Qozog‘iston O‘zbekisonga bir necha yuz tonna oziq-ovqat mahsulotlaridan iborat insonparvarlik yordami yuboradi. Bu haqda “Zakon.kz” xabar berdi.

Qayd etilishicha, Qozog‘iston hukumati rahbari Asqar Mamin bu haqda tegishli qarorni imzolagan. Hujjatga ko‘ra, O‘zbekistonga 600 tonna bug‘doy uni, 250 tonna grechixa, 100 ming litr o‘simlik yog‘i va 50 ming sut konservalari yuboriladi.

Qozog‘iston, shuningdek, Afg‘onistonga ham insonparvarlik yordami yuboradi. Ularga yuboriladigan gumanitar yordam besh ming donadan ortiq tovarlardan iborat. Bundan tashqari, ko‘rpa-yostiq, qishki chodirlar, metall karavotlar, matraslar, yostiq jildlari, choyshablar va adyollar, shuningdek, issiq kiyimlar ham taqdim etiladi.

Qozog‘iston Tashqi ishlar vazirligi gumanitar yordam oluvchilarni aniqlab, ularni yetkazib berish bo‘yicha chora-tadbirlarning muvofiqlashtirilishini ta’minlashi kerak. Mamlakatning Sanoat va infratuzilmani rivojlantirish vazirligiga gumanitar yuklarni O‘zbekiston va Afg‘onistondagi manzillarga tashish hamda yetkazib berish vazifasi topshirilgan.

Eslatib o‘tamiz, iyul oyining o‘zida AQSh tashkiloti O‘zbekistonga 600 ming dollarlik insonparvarlik yordamini yubordi, O‘zbekistonga Singapurdan 30 ta kislorod konsentratori beg‘araz yordam sifatida olib kelindi, Janubiy Koreya koronavirus pandemiyasiga qarshi kurashish uchun O‘zbekistonga ikkinchi insonparvarlik yordamini yubordi, JSST ham O‘zbekistonga qiymati 4 million dollardan ortiq bo‘lgan insonparvarlik yordami jo‘natdi.

O‘zbekiston esa koronavirusga qarshi kurashda yordam berish uchun Qirg‘izistonga navbatdagi insonparvarlik yordamini yubordi.