Buxoro viloyatining Qorako‘l tumani “Sayyod” mahallasida yashovchi 47 yoshli Istam Xolmurodov 10 yillik jazo muddatini o‘tab qaytgach, tuman hokimligi, shuningdek, MFY vakillari tomonidan bosimga uchrayotganini aytmoqda.
“Jazo muddatini o‘tab qaytganlar yana jinoyat yo‘liga kirib ketmasligi uchun qo‘llab-quvvatlash o‘rniga meni talashyapti. Bosim o‘tkazishyapti. Ayniqsa, tuman hokimi Sherali Salomov qabuliga bir necha bor yordam so‘rab kirganman. Muammolarimni yechish o‘rniga o‘zimga tegishli bo‘lgan ko‘chmas mulk, ya’ni yer-joyimni boshqalarga tarqatib berish payiga tushgan. Mening mulkimni talashga hech kimning haqi yo‘q-ku”, — deydi Istam Xolmurodov.
Murojaatchining aytishicha, u ukasining o‘limida nohaq ayblanib, o‘n yildan ortiq vaqt davomida jinoyatini tan olishga majburlangan.
“Mayli, jazo muddatini o‘tab kelganim boshqa masala. Ammo 2020-yilning 27-aprelida Buxoroda sodir bo‘lgan tabiiy ofatdan ko‘pchilik qatori bizning uy-joyimiz ham talafot ko‘rdi. Ayniqsa, onam Norgul Qahhorovaning uy-joyi qulab, achinarli ahvolga keldi. Naridan beri qilib poydevorini tiklashdi. Ko‘p o‘tmay, sifatsiz betonlar quyilgani uchun poydevorlar yorila boshladi. Bunday nosoz poydevor ustida uy-joy tiklashning esa iloji yo‘q. Ko‘zbo‘yamachilik qilingan. Ustiga-ustak, onamning nomiga 50 ta shifer berilgani bo‘yicha soxta hujjat rasmiylashtirilgan. Ushbu masalalarni tuman hokimligi vakillariga bildirsam, ‘o‘tirib chiqqanim’-u, aslida kimligimni ro‘kach qilaverishadi”, — deydi u.
“Sayyod” mahalla fuqarolar yig‘ini raisi Rustam Haydarov “Daryo” muxbiri bilan telefon orqali muloqotda fuqaro Istam Xolmurodov doimiy e’tiborda ekanini bildirdi. Shuningdek, onasiga berilgani aytilgan 50 dona shifer ham o‘ziga berilganini qo‘shimcha qildi. Aytishicha, bu haqda dalolatnoma ham tuzilgan.
“O‘tgan yili nochor ahvolda yashaydigan ukalari — Ulug‘bek, Nodir va Shuhrat Xolmurodovlar, shuningdek, singlisi Husnora Xolmurodovani ish bilan ta’minlayman, deganiga xursand bo‘lib, davlatdan 30 million so‘m imtiyozli kredit olishiga mahalla-ko‘y ko‘maklashdik. Biroq imkoni bo‘la turib, undan foydalana olmadi. Og‘a-inilari bilan kelisholmagach, uning ukasi Shuhrat Xolmurodov va Marziya Qandimovani jamoatchilik asosida ish bilan ta’minladik. Mazkur oilaga yangi uy qurish uchun tuman hokimligi tomonidan olti sotix yer maydoni ajratilgan. Ayni paytda ukasi Shuhrat Xolmurodovga qishloqda mavjud eski binolarning birini yashashi uchun moslashtirib berganmiz”, — deydi MFY raisi.
Tuman hokimligi mas’ul xodimi Rabbonaqul Muxtorovning “Daryo”ga ma’lum qilishicha, Istam Xolmurodovda belgilangan miqdordan ortiq hosildor yer bor. Yem-xashak yetishtirish imkoniyati bor. Shunga qaramay, 30 million so‘m imtiyozli kredit evaziga xarid qilgan yetti bosh qoramolining to‘rt boshini sotgan. Qolgan qoramollari ham qarovsiz ahvolda.
“Noto‘g‘ri, to‘rt bosh qoramolni boqish uchun yem-xashak yetishtirib bera olmaganim sababli ularni sotdim. Lekin yana oilaviy tadbirkorlikni rivojlantirishni ko‘zlaganman. Shu bois takroriy ekin maydonlaridan vaqtincha foydalanish maqsadida tuman hokimi Sherali Salomov qabuliga bir necha bor yer so‘rab bordim. Undan tayinli javob olmadim. Tuman hokimi eshitishniyam xohlamadi, — deydi Istam Xolmurodov. — Uning tavsiyasi bilan ‘Qahramon Akbar’ fermer xo‘jaligiga yer so‘rab borsam, senga yer bermayman deyishdi. Aybim nima?”.
Ma’lum bo‘lishicha, “Qahramon Akbar” fermer xo‘jaligi hisobidagi 14 gektar yer maydoni g‘alla ekinlariga, 22 gektar yer maydoni esa paxtaga mo‘ljallangan. Hosillar topshirilgach, yer takroriy ekin ekish uchun qishloq aholisiga ajratib berilgan. Fermer xo‘jaligi ish yurituvchisi Arash Rustamovning “Daryo” muxbiriga aytishicha, fuqaro Istam Xolmurodov takroriy ekin uchun yer maydoni olishda mutlaqo noo‘rin talab qo‘ymoqda. Unga yashash manzilidan 150-200 metrcha uzoqlikdagi yerlaridan taklif qilingan. Biroq u buni rad etgan.
“Men, albatta, unga takroriy ekin uchun boshqalar tomonidan vaqtincha o‘zlashtirilmagan maydondan yer ajratib beraman. Ammo u shundoq uyimning derazasidan ko‘rinib turgan yerdan berasan, deb oyoq tirab olgani yaxshimas-da! Ekilgan va boshqa kishi foydalanayotgan yer maydonini qaysi vijdon bilan unga olib beramiz axir. Istam Xolmurodov talab qilayotgan yer maydonlarida talafot va pandemiyadan birdek aziyat chekayotgan fermer xo‘jaligi a’zolari tirikchilik qilmoqda. Suv yaqinda bo‘lishiga qaramasdan, u o‘z uy-joyi atrofida o‘ziga tegishli hosil olishga moslashtirilgan yerdan unumli foydalanmaydi. Buni ko‘p bora o‘ziga ham aytganmiz”, — deydi Arash Rustamov.
“Daryo” muxbiri surishtiruvi davomida fuqaro Istam Xolmurodovga “Qahramon Akbar” fermer xo‘jaligi rahbari tavsiya qilgan joydan 50 sotix yer maydoni ajratilib, takroriy ekin ekishga berilgani ma’lum qilindi.
“Fermer xo‘jaligi tomonidan ekin ekishga moslashtirilgan yerlar o‘zboshimchalik bilan o‘zining yaqinlariga uy-joy tiklash uchun ajratib berilgan. Qanchadan qancha davlat yerlari talon-toroj qilingan. Mahallaning amaldagi raisi avvalgi rais bilan til biriktirib, qishloqda guruhbozlikni keltirib chiqarmoqda. Bu masalalarga rahbariyat e’tiborsiz, panja ortidan qaramoqda. Shunday paytda menga o‘zim istagan joydan vaqtincha foydalanishim uchun yer berish shuncha mushkulmi? Singlimga ham uy-joy berishsin, ayni paytda onamdan tashqari, u ham farzandi bilan bizning hovlida yashayapti. Bor-yo‘g‘i uch xonali uyimiz bor”, — deydi Istam Xolmurodov.
Ayni paytda Istam Xolmurodov ikkinchi oilasi bilan 36,6 sotixli uy-joy va yer maydonida yashab kelmoqda. Xolmurodovga tegishli bo‘lgan ortiqcha yer maydonlaridan begonalar uchun emas, o‘z ukasi va singlisi uchun yer berish so‘ralgan.
“Erim vafot etgani bois bir nafar farzandim bilan onamning uyiga qaytdim. Ayni paytda onamning talafot ko‘rmagan uy-joyining bir qismida farzandim bilan yashayapman. Onam esa akamning hovlisida yashayapti. Ammo akam foydalanib kelayotgan ortiqcha yer maydonidan menga 7,5 sotix ajratib berilishi masalasiga qarshiman”, — deydi Istam Xolmurodovning singlisi Husnora Xolmurodova.
Qorako‘l hokimi Sherali Salomov “Daryo” muxbiri bilan suhbatda 2020-yilning 27-aprelida Buxoroda sodir bo‘lgan talafotda fuqaro Istam Xolmurodovning onasi Norgul Qahhorovaga tegishli uy-joyning zarar ko‘rgan qismini yangidan qurish ishlari tuman prokurori Mels Rahmonov tomonidan nazoratga olinganini bildirdi. Shuningdek, ayni paytda ham Qorako‘lda tiklash-ta’mirlash ishlari davom etayotgani bois manzillarga navbatma-navbat kirib borilayotgani, tuman bo‘ylab ijtimoiy himoyaga muhtoj insonlarni uy-joy bilan ta’minlash bo‘yicha tizim ishlayotganini aytib o‘tdi.
“Shu o‘rinda bir oilaga 36,6 sotix yer maydoni keragidan ortiq ekanligini ham unutmasligimiz kerak. Yer to‘g‘risidagi qonun hujjatlariga muvofiq, 1998-yildan 2019-yilning 28-dekabrigacha har bir xonadon olti sotix yer maydonidan uy-joy va tomorqa yerlari uchun foydalanishi belgilangan. Vazirlar Mahkamasining 2019-yil 28-yanvardagi qonuniga ko‘ra, yerdan foydalanish kimoshdi savdosi orqali amalga oshiriladi. Shu nuqtayi nazardan, fuqaro Istam Xolmurodov haqiqatan ham tuman hokimligi mutasaddilaridan norozi bo‘layotgan bo‘lsa, barcha vajlari ishchi guruh tomonidan o‘rganiladi va huquqiy baho beriladi, — dedi tuman hokimi Sherali Salomov. — Ammo, shuni ishonch bilan aytamanki, bu fuqaroga men yoki boshqa tuman mutasaddilari tomonidan bosim o‘tkazilmagan.”
Izoh (0)