O‘zbekistonda 2020/2021-o‘quv yili uchun oliy ta’lim muassasalarining bakalavriat ta’lim yo‘nalishlariga abituriyentlarni onlayn ro‘yxatga olish yakunlandi. Bu haqda Davlat test markazi xabar berdi.

Foto: “Daryo”

Ro‘yxatga olish 20-iyundan 20-iyulga qadar barcha hududlarda DTMning rasmiy veb-sayti va Yagona interaktiv davlat xizmatlari portali , respublikaning 8 ta tumanida esa Davlat xizmatlari markazlari orqali amalga oshirildi.

Qayd etilishicha, ro‘yxatdan o‘tgan jami abituriyentlar soni 1 484 085 nafarni tashkil etdi. Shundan 536 144 nafari (36,13 foiz) 2020-yil bitiruvchilaridir.

Ta’lim shakli bo‘yicha:

  • Kunduzgi ta’lim shakli – 798 608 nafar (53,81 foiz);
  • Sirtqi ta’lim shakli – 648 733 nafar (43,71 foiz);
  • Kechki ta’lim shakli – 36 744 nafar (2,48 foiz).

Tillar kesimida:

  • O‘zbek tili – 1 297 445 nafar (87,42 foiz);
  • Rus tili – 139 115 nafar (9,37 foiz);
  • Qoraqalpoq tili – 44 279 nafar (2,98 foiz);
  • Boshqa tillar – 3 246 nafar (0,22 foiz).

Eslatib o‘tamiz, O‘zbekistonda OTMlarga kirish imtihonlarini 25-iyuldan 20-avgustgacha o‘tkazish rejalashtirilayotgandi. Biroq O‘zbekistonda koronavirus bilan bog‘liq vaziyatning keskinlashayotgani sababli 10-iyuldan 1-avgustgacha mamlakatda qat’iy karantin choralari joriy qilindi.