Taniqli olim, ko‘p yillar davomida O‘zbekiston bank sohasi rivojiga katta hissa qo‘shgan yetuk mutaxassis, Markaziy bank raisining sobiq o‘rinbosari, iqtisodiyot fanlari doktori Ashur Qodirov vafot etdi. Bu haqda O‘zbekiston Fanlar akademiyasi xabar berdi.
Ashur Qodirov 1953-yilning 23-sentabrida Buxoro viloyatining G‘ijduvon shahrida tug‘ilgan. 1974-yil Toshkent xalq xo‘jaligi instituti (hozirgi Toshkent davlat iqtisodiyot universiteti)ni tamomlagan.
U Moskva moliya institutida fan nomzodi darajasini qo‘lga kiritgan bo‘lgan bo‘lsa, doktorlik dissertatsiyasini Sankt-Peterburg moliya-iqtisodiyot universitetida professor V.S.Gerashchenko rahbarligi ostida himoya qilgan.
Qodirov turli yillarda Toshkent davlat iqtisodiyot universitetining “Pul muomalasi va kredit” hamda “Xalqaro valyuta va kredit munosabatlari” kafedralarida faoliyat yuritgan.
Shuningdek, Ashur Qodirov 1996-yildan 2006-yilga qadar O‘zbekiston Markaziy bank raisi o‘rinbosari, 2006—2017-yillarda “Mikrokreditbank” aksiyadorlik tijorat banki boshqaruv raisi maslahatchisi lavozimlarida ishlagan va O‘zbekiston bank sohasi rivojiga katta hissa qo‘shgan.
Ashur Qodirov umrining so‘nggi yillarini yoshlarga ta’lim berishga bag‘ishlab, “Mikrokreditbank” aksiyadorlik tijorat bankining o‘quv markazi direktori sifatida ham faoliyat yuritgan hamda ko‘plab shogirdlarni yetishtirgan.
Qodirov, shuningdek, dolzarb iqtisodiy masalalarga bag‘ishlangan qator ilmiy maqolalar muallifi hamdir. Olimning oxirgi ilmiy ishlardan biri 2019-yilning iyulida akademik Sh.Ayupov bilan hammualliflikda chop etilgan “Oila iqtisodini boshqarish orqali raqamli iqtisodiyotga o‘tish” monografiyasi bo‘ldi.
Xabarda 67 yoshli Ashur Qodirovning o‘limi sababiga oydinlik kiritilmagan.
Avvalroq Monopoliyaga qarshi kurashish qo‘mitasining 40 yoshli boshqarma boshlig‘i, Madaniyat vazirligining 32 yoshli xodimi, Muzrabot tumani hokimligining 35 yoshli bo‘lim boshlig‘i o‘rinbosari vafot etgani haqida xabar berilgan edi. Shuningdek, Madaniyat vazirligining xodimi va Muzrabot tumani hokimligining bo‘lim boshlig‘i o‘rinbosari koronavirusga chalingani tasdiqlangan.
O‘zbekistonda 21-iyul soat 10:00 holatiga ko‘ra, koronavirus infeksiyasi qayd etilganlar soni 17 590 nafarga yetgan. Ayni paytda O‘zbekistonda 9463 nafar koronavirus infeksiyasiga chalingan fuqaro (54 foiz) sog‘aygan. Sog‘liqni saqlash vazirligi taqdim etib kelayotgan statistika bo‘yicha mamlakatda epidemiya boshlanganidan buyon 92 kishi vafot etgan.
Izoh (0)