Buxoroda koronavirusga chalinganlar 633 nafarga, vafot etganlar esa 4 nafarga yetdi

Buxoroda COVID-19’ virusi tarqalishining oldini olish va unga qarshi davolash-profilaktika ishlari sifatini tubdan yaxshilash bo‘yicha qilinayotgan ishlarga qaramasdan, ijtimoiy tarmoqlarda viloyatda zarur dori vositalarining tanqisligi, aholining ehtiyoji keskin ortgan paytda ayrim dorixonalarda narx-navoning sun’iy oshirilayotganligi, tez tibbiy yordamning shoshilinch chaqiruvlarga kech yetib borayotgani xususida noroziliklar ko‘paygan.

Buxoro viloyat hokimligi axborot xizmatining “Daryo”ga xabar berishicha, ushbu masalalar yuzasidan viloyat hokimi vazifasini bajaruvchi Karim Kamolov buxoroliklarga qilgan murojaatida alohida to‘xtalib o‘tgan.

Viloyat hokimiga ko‘ra, 20-iyul holati bo‘yicha viloyatda COVID-19’dan zararlanganlar 633 nafarga yetgan. Shundan 530 nafari sog‘ayib, o‘z oilasi bag‘riga qaytgan, 4 nafar fuqaro vafot etgan. Shifoxonalarda 99 nafar fuqaro statsionar davolanmoqda. Ulardan 14 nafari – og‘ir, 24 nafari – o‘rta og‘ir va 61 nafari – qoniqarli holatda. Shuningdek, bugunga kelib jami 9 ming 933 nafar fuqaro karantinga olingan bo‘lib, ulardan 1 ming 343 nafari kasalxonada, 3 ming 599 nafari uy sharoitida shifokorlar nazoratida bo‘lib turibdi. Hududda 153 ta tez tibbiy yordam brigadasi va 15 ta maxsus reanimatsion brigada faoliyat ko‘rsatadi.

“Buxoroning turli manzillarida maxsus tayyorlangan o‘nga yaqin shifoxonalarda ayni kunga qadar 930 ta o‘rin mobilizatsiya qilingan. Viloyat teri-tanosil kasalliklari dispanserida, fiziatriya va pulmonologiya markazi hamda Buxoro shahar tibbiyot birlashmasida yana qo‘shimcha 300 ta o‘rin hozirlab qo‘yilgan. COVID-19 bilan kasallangan bemorlarni davolash uchun 10 ming bemorga yetadigan, umumiy qiymati 5 milliard 200 million so‘mlik 49 turdagi dori vositalari zaxirasi shakllantirilgan, — dedi viloyat hokimi vazifasini bajaruvchi Karim Kamolov. — Mavjud tibbiyot muassasalarini kerakli dori vositalari va tibbiyot buyumlari bilan uzluksiz ta’minlash maqsadida bir oyda 9 milliard 500 million so‘m (3 ming nafar bemorni davolash uchun) mablag‘ talab etilishini inobatga olgan holda viloyatda 3 oylik dori vositalari zaxirasini yaratish maqsadida zarur choralar ko‘rildi. Biroq ko‘rilayotgan chora-tadbirlar xotirjamlikka berilishimizga asos bo‘lolmaydi”.

Buxoro hokimining ta’kidlashicha, aholi orasida vahima uyg‘otmaslik, bozorlardagi narx-navoning sun’iy oshib ketishiga yo‘l qo‘ymaslik maqsadida bosh prokuratura huzuridagi iqtisodiy jinoyatlarga qarshi kurashish departamenti va soliq idoralarida ishchi guruhlar tuzilgan. Ular dehqon bozorlari va yirik savdo majmualarida nazorat tadbirlarini tashkil etib, narxni asossiz ravishda oshirganlarga nisbatan qonuniy chora ko‘rmoqda.

“Nafaqat, dori-darmon vositalari, balki non va non mahsulotlari narxini ham o‘zboshimchalik bilan oshirishga, bu sinovli kunlarda o‘z manfaati yo‘lida xalqning rizq-u nasibasiga putur yetkazishga hech kimning haqi yo‘q. Bugun har birimiz sinov maydonidamiz, yakdillik va hamjihatlik — qiyin vaziyatdan qutulishning birdan bir yo‘li ekanligini unutmaylik”, — dedi viloyat rahbari.

Viloyat maxsus shtabi mas’ulining “Daryo”ga qo‘shimcha qilishicha, hududda vaziyatni barqarorlashtirish maqsadida 20-iyul kuni shahar oilaviy poliklinikalariga 10 ta qo‘shimcha Damas berilgan.