Telegram’da va ijtimoiy tarmoqlarda Toshkent shahrida koronavirus, boshqa kasalliklar bilan kasallanganlarni davolash, aholiga tez tibbiy yordam ko‘rsatish maqsadida yangi reanimobillar olib kelinayotgani haqidagi videolar tarqaldi.
Videolarning birida oqshom vaqtida miltillab turuvchi chiroqlari, sirenalarini yoqib manzil tomon shoshayotgan yangi reanimobillar karvoni aks etgan.
Boshqa bir video esa Samarqandda Isuzu D-Max pikaplari negizida ishlab chiqarilgan reanimobillarining “Erkin” posti orqali poytaxtga olib kelinayotgani xususida. Unda ham Tez tibbiy yordam xizmati uchun Samarqanddan kelayotgan mashinalar karvoni tasvirga olingan.
2020-yil 3-iyulda O‘zbekistonda Isuzu D-Max pikaplari negizida tez yordam mashinalari ishlab chiqarilishi, 7-iyulda O‘zbekiston koronavirusga chalingan bemorlar uchun yana 15 ta yangi reanimobil xarid qilingani, 17-iyulda Toshkent shahar hokimligi koronavirusga qarshi kurash uchun o‘pkani sun’iy nafas oldirish apparatlari va Damas avtomobillari sotib olgani haqida xabarlar berilgan.
O‘zbekiston bosh prokurori Nig‘matilla Yo‘ldoshev 15-iyul kuni Prezident videoselektoridan so‘ng bundan buyon 15 daqiqadan ko‘p bo‘lmagan vaqtda zudlik bilan tez tibbiy yordam avtomashinalari tegishli xodimlar bilan yetib borishi to‘liq ta’minlanishini aytgan, shuningdek, fuqarolar 103 ga murojaat qilganda, bandlik holatlari, ayniqsa uzoq vaqt band bo‘lish holatlariga mutlaqo chek qo‘yilishini bildirgan.
Izoh (0)