Toshkentning Sergeli tumanida joylashgan Yangi Choshtepa dahasida olib borilayotgan qurilish ishlari hududida quruvchilar o‘rtasida ommaviy mushtlashuv sodir bo‘lgani xabar berilgan edi. Sergeli tumani IIO FMBning “Daryo”ga ma’lum qilishicha, unda ishtirok etgan besh kishiga ma’muriy qamoq jazosi tayinlandi.
Eslatib o‘tamiz, voqea 16-iyul, payshanba kuni soat 19:09 larda “OOO Silver Tulip” quruvchi tashkilotning ikki ishchisi — 28 yoshli qashqadaryolik O‘.M. va andijonlik 30 yoshli M.K. o‘rtasida “shpatel” talashish sababli yuzaga kelgan. Shundan so‘ng janjalga boshqa ishchilar ham qo‘shilgan. Jarayon shu hududdagi ko‘p qavatli uylarda istiqomat qiluvchi H.M. (1992-yilda tug‘ilgan) tomonidan uyali telefonga yozib olinib, internetga chiqarib yuborilgan.
Voqea joyiga ichki ishlar xodimlari yetib kelib, janjalning asosiy sababchilari va ishtirokchilari qo‘lga olingan. Ularning besh nafariga nisbatan ma’muriy huquqbuzarlikka oid hujjat rasmiylashtirilib, mazmunan ko‘rib chiqish uchun sudga yuborilgan.
Sergeli tuman ma’muriy sudining 17-iyuldagi qarori bilan “OOO Silver Tulip”ning besh nafar ishchisining har biriga Mamuriy javobgarlik to‘g‘risidagi kodeksning 183-moddasi (Bezorilik) asosida 10 sutka ma’muriy qamoq jazosi tayinlangan.
Qayd etilishicha, qurilish tashkiloti 12 ta brigadadan iborat bo‘lib, 439 nafar ishchi va 33 nafar qorovul ishlaydi. Ular bilan korxona rahbari ishtirokida tezkor-profilaktik suhbat o‘tkazilib, kelgusida huquqbuzarlik va jinoyat sodir etmaslik to‘g‘risida rasman ogohlantirilgan.
Izoh (0)