Qozog‘iston prezidenti Qosim-Jo‘mart To‘qayevning maslahatchisi O‘ljas Xudaybergenev mamlakat sog‘liqni saqlash vaziri Aleksey Soyning koronavirus va pnevmoniya bilan kasallanganlar statistikasini birlashtirish haqidagi bayonotiga munosabat bildirdi. U mazkur qarorning qabul qilinish sabablari va mamlakatda kasallanganlarning real soni qancha ekanini tahlil qilishga uringan, deb yozmoqda “Liter.kz”.
“Hozirda mamlakatda koronavirus bilan kasallanganlar soni 67 ming nafarni tashkil qilmoqda (Xudaybergenev bu boradagi postini Facebook’dagi sahifasiga 17-iyulda joylashtirgan, hozir ushbu fikrlar o‘chib ketgan), pnevmoniya bilan kasallanganlar esa taxminan 234 ming nafar (1-yanvardan 15-iyulgacha bo‘lgan oraliqda), pnevmoniyaning o‘rtacha o‘sib borishi hisoblab chiqilsa taxminan 163 mingta holat bo‘lishi mumkin. Yakunda 67 mingga 163 mingni qo‘shamiz va kamida 230 ming nafar qozog‘istonlikning koronavirus bilan kasallangan bo‘lib chiqmoqda. O‘rtacha o‘sishni emas balki real ko‘rsatkichni hisoblab chiqilsa, pnevmoniya bilan kasallanganlar 230 ming emas, tuzalganlar bilan qo‘shib hisoblaganda 301 ming nafarni tashkil qiladi”, — deb yozgan Xudaybergenev.
To‘qayev masalahatchisi koronavirusning simptomsiz shakli bilan kasallangan va uyda davolangan bemorlarni ham hisob-kitob qildi. Shu tariqa u taxminan 2 millionga yaqin qozog‘istonlikning COVID-19 bilan kasallangan bo‘lishi mumkinligini yozgan.
“Uyda kasallikdan tuzalganlarning soni qancha ekani hech kimga ma’lum emas. Kasalxonalarga faqat kasallik alomatlari kuzatilgan bemorlarning 85 foiz qismi murojaat qilgani hisobga olinsa, taxminan 2 million nafar fuqaro kasallikka chalingani ma’lum bo‘ladi. Adashayotgan bo‘lishim mumkin, lekin eng muhimi endi Qozog‘iston sog‘liqni saqlash vazirligi koronavirus epidemiyasiga to‘g‘ri munosabatda bo‘lmoqda”, — degan amaldor.
Shuningdek, u epidemiya davri davomida Qozog‘istonda qancha odam infeksiya asoratlari oqibatida vafot etgan bo‘lishi mumkinligini ham hisoblab chiqqan.
“Hozir (17-iyulda) koronavirusdan o‘lganlar soni 464 nafarni tashkil qilmoqda. Pnevmoniya oqibatida 1-yanvardan 15-iyulgacha bo‘lgan davr oralig‘ida vafot etganlar soni esa — 3 327 nafar. Bu o‘tgan yilgi ko‘rsatkichdan 1,75 baravarga ko‘p, 2019-yilda 1896 kishi pnevmoniyadan vafot etgan. Bundan kelib chiqadiki, koronavirusdan vafot etganlar soni kamida 1895 nafar, ko‘pi bilan esa 3791 nafar. Koronavirusdan kasalxonalarda davolangan, ammo boshqa kasallikdan vafot etganlar (o‘tkir yurak yetishmovchiligi, insult, infarkt va boshqa) qo‘shib hisoblaganda, ya’ni qarindoshlari dafn qilish uchun bahonalar o‘ylab topib, pora bergan marhumlarni qo‘shib hisoblaganda qurbonlar soni yana ko‘pligi oydinlashadi”, — degan u.
Qozog‘iston sog‘liqni saqlash vaziri Aleksey Soy koronavirus hamda pnevmoniya bilan kasallanganlar statistikasini birlashtirish ushbu kasalliklarni yuqtirib olish bilan bog‘liq vaziyatni to‘g‘ri prognoz qilish, zarur resurslardan, xususan, tibbiyot xodimlari, koykalar, tibbiyot uskunlalari, dori vositalaridan xolis tarzda foydalanish, shuningdek, statitistika shaffofligini ta’minlashga xizmat qilishini ta’kidlagandi.
Qozog‘istonda 19-iyul holatiga ko‘ra 70 339 ta kasallanish holati qayd etilgan, 43 029 nafar bemor kasallikdan tuzalgan, 375 kishi infeksiya asoratlari oqibatida hayotdan ko‘z yumgan.
Izoh (0)