“O‘zgidromet” hafta davomida qanday ob-havo kuzatilishini ma’lum qildi

“O‘zgidromet”ning xabar berishicha, butun ish haftasi mobaynida O‘zbekiston hududida ob-havo issiq va quruq bo‘ladi. Faqat 20—21-iyul kunlari respublikaning tog‘oldi va tog‘li tumanlarida qisqa muddatli yomg‘ir yog‘ishi va momaqaldiroq bo‘lishi mumkin.

Harorat bu kunlarda kechasi 20-25 daraja iliq, kunduzi 35-40 daraja issiq bo‘ladi, respublikaning ayrim joylarida (asosan, mamlakatning janubiy va cho‘l zonalari) havo harorati 42 darajaga yetadi. Qayd etilishicha, bu me’yoriy qiymatlardan 4-6 darajaga yuqoridir.

“Harorat fonining yuqori bo‘lishiga qaramasdan, bu bizning mintaqa uchun anomal harorat emas. Shunday, masalan, 2018—2019-yillarda xuddi shu davrda kunduzgi harorat 40-43 darajagacha yetgan. Respublikamiz shimoli va cho‘l zonasida harorat qiymatlari 44-46 daraja issiq bo‘lgani qayd etilgan. Shu davr uchun eng yuqori harorat Navoiy viloyatidagi Buzauboy meteostansiyasida 2019-yil 20-iyulda qayd etilgan, o‘shanda havo harorati termometr ustunchasining 47,7 daraja ko‘rsatkichida to‘xtagan”, — deyiladi xabarda.