Toshkent shahrida 113 ta yangi kasallanish holati aniqlandi. O‘zbekistonda kasallanganlarning umumiy soni 16 600 nafardan oshdi

O‘zbekistonda 19-iyul soat 17:00 holatiga ko‘ra, koronavirusga chalinganlarning soni 178 nafarga ko‘payib, jami kasallanish holatlari soni 16 607 taga yetdi. Bu haqda Sog‘liqni saqlash vazirligi xabar bermoqda.

Yangi kasallanish holatlarining

• 65 tasi karantin markazidagi (barchasi xorijdan kelgan) fuqarolar orasida;
• 113 tasi Toshkent shahrida tana harorati ko‘tarilganligi sababli profilaktika maqsadida hamda koronavirusga chalingan bemorlar bilan muloqotda bo‘lganligi sababli namuna olingan fuqarolar orasida aniqlangan.

Shuningdek, SSV xabarida, Toshkent shahridagi tibbiyot muassasalarida 26 nafar, Sirdaryo viloyatida 14 nafar hamda Andijon viloyatida 11 nafar, jami 51 nafar bemor tuzalgani aytilgan.

“Sog‘ayganlar soni 9 178 nafarni (55 foiz) tashkil qilmoqda. 7 344 nafar bemorga shifokorlar tomonidan belgilangan standartlar bo‘yicha davo choralari ko‘rilmoqda”, — deyiladi xabarda.

Avval 19-iyul soat 10:00 holatiga ko‘ra, koronavirus infeksiyasini yuqtirib olganlar soni 243 kishiga ko‘paygani va kasallanganlarning umumiy soni 16 429 nafarga yetgani xabar qilingandi.

Sog‘liqni saqlash vazirligi tomonidan yuritilayotgan hisob bo‘yicha, rasman bemorlarning 85 nafari vafot etgan (“Daryo” hisobi bo‘yicha vafot etgan bemorlar soni kamida 86 nafarni tashkil etadi).