Ijtimoiy tarmoqlarda farzandining isitmasi ko‘tarilib, nafas olishi qiyinlashayotgani va tez yordamga qo‘ng‘iroq qilsada-da, zarur tibbiy yordam ko‘rsatilmayotganidan shikoyat qilgan onaning Samarqand viloyati hokimi Erkinjon Turdimovga video murojaati tarqaldi.
Videoda ona 27 yoshli farzandining isitmasi ko‘tarilib, 10 kundan beri tushmayotgani, nafas olishi qiyinlashayotganini, tez yordamga qo‘ng‘iroq qilsa-da, kelmagani, poliklinika ham yordam bermaganini aytgan.
Zarnews’ning Samarqand viloyati sog‘liqni saqlash boshqarmasiga tayanib xabar berishicha, ayni paytda Samarqand shahridan bo‘lgan bemor A.Musinov viloyat yuqumli kasalliklar shifoxonasiga yotqizilib, davolanmoqda.
“10-iyuldan boshlab bemorning tana harorati 38 gacha ko‘tarilgan va uy sharoitida davolangan. Lekin jarayon poliklinika bo‘lim boshlig‘i tomonidan nazorat qilib borilgan. 13-iyul kuni bemor poliklinikada tuzilgan vrachlar guruhi tomonidan ko‘rilgan va umumiy ahvoli to‘g‘ri baholanib, statsionarga yotqizilgan. Hozirda bemorning umumiy holati yaxshi”, — degan Samarqand shahar tibbiyot birlashmasi boshlig‘i Ahmadjon Bobojonov.
Shuningdek, bemorning onasi tomonidan o‘ziga yo‘llangan audioyozuvni ham taqdim etgan. Unda ayol bolasining ahvoli og‘irlashgani uchun xavotir olgani, ona bo‘lgani uchun uni to‘g‘ri tushunishni so‘ragan.
Eslatib o‘tamiz, Prezident Shavkat Mirziyoyev 15-iyul, chorshanba kuni Toshkent shahri va Toshkent viloyatida pandemiya bilan bog‘liq vaziyat muhokamasiga bag‘ishlangan videoselektor yig‘ilishida Toshkentda oxirgi 3 kunda tez yordamning vaqtida yetib bormagani sababli 43 kishi turli kasalliklar bilan vafot etgani ma’lum qilingan.
O‘zbekiston bosh prokurori Nig‘matilla Yo‘ldoshev ushbu videoselektordan so‘ng “endi tez yordam 15 daqiqa ichida yetib boradi”, deb aytgan, bundan buyon har bir fuqaro 103 ga murojaat qilganda, bandlik holatlari, ayniqsa uzoq vaqt band bo‘lish holatlariga mutlaqo chek qo‘yilishini bildirgan.
Mavzuga doir: O‘zbekistonda tez yordam vaqtida yetib kelmagani oqibatida 2 yilda 48 mingdan ortiq odam vafot etgan
Ma’lumot uchun, 2017—2018-yillar mobaynida O‘zbekiston tarixida birinchi marta tez tibbiy yordam xizmati uchun 1500 ta yangi ixtisoslashgan avtomashina xarid qilingan. 2020-yil yanvar oyida Toshkentdagi tez tibbiy yordam xizmati uchun xorijdan keltirilgan 150 ta Ford zamonaviy reanimobili foydalanishga topshirilgan. Viloyatlarda ham shunday tizimni joriy qilish rejalashtirilgan. Bundan tashqari, O‘zbekistonda Isuzu D-Max pikaplari negizida tez tibbiy yordam mashinalarini ishlab chiqarish rejalashtirilmoqda.
Izoh (0)