JSST samarasiz deb topgan “Gidroksixloroxin” preparati O‘zbekistonda nega qo‘llanilayotganiga izoh berildi

Avvalroq O‘zbekistonda koronavirusdan uyida davolanayotgan bemorlar bepul dori-darmon bilan ta’minlanishi, ularning orasida “Gidroksixloroxin” preparati borligi tarmoqlarda bir qancha bahslarga sabab bo‘lgan edi.

Koronavirusga qarshi kurash shtabi a’zosi Feruza Hamroboyeva ushbu e’tirozlarga munosabat bildirib o‘tdi.

Jumladan, aholining “Gidroksixloroxin”ni koronavirus infeksiyasini davolashda qo‘llash noto‘g‘riligi ma’lum qilindi. Chunki kasallikka qarshi ko‘rsatmalari ko‘p ekan. Lekin nega bu preparat davolash protokoliga kiritilgan?, degan savoliga mutaxassis quyidagicha javob bergan.

“Gap shundaki, biz o‘zimizning konsultativ vebinarlarimizni asosan Xitoy bilan olib boryapmiz. Chunki bu virus qayd etilgan ilk hudud, ularning tajribasi ko‘proq va dastlabki kunlardanoq ularning tajribasini qo‘llab kelyapmiz. Bemorlarni davolash jarayonida bu yaxshi natija bergan. Agar bunday olib qaralsa, qo‘llashga qarshi holatlar qaysi kuchli ta’sirga ega dorilarda yo‘q deysiz? Albatta, hammasida bor. Ammo biz doim foyda nojo‘ya ta’siridan ko‘proq bo‘lsa, tajribamizda amaliy ifodasini topsa, qo‘llaymiz. Buning ustiga aytishim kerakki, klinik protokol bu bir umrlik hujjat emas, u doim qayta ko‘rib chiqiladi olinadigan ma’lumotga qarab. Qaysidir preparatlar kiritiladi, boshqalari chiqariladi”,— deya savolga javob berdi Feruza Hamroboyeva.

Hamroboyeva tilga olgan Xitoydagi tadqiqotlar bezgakka qarshi dori pnevmoniya rivojlanishini to‘xtatishda, o‘pka holatini yaxshilashga va kasallik davomiyligini qisqartirishga samarali ta’sirini ko‘rsatgani aniqlangan. Tadqiqot mualliflari, koronavirusni davolash uchun har kuni 500 mg “Xloroxin”ni 10 kun davomida qabul qilish yetarliligini ta’kidlagan.

Shuningdek, 2020-yil fevral oyida fransuz olimlari yangi koronavirusga qarshi ikkita mavjud dori preparatlari: “Gidroksixlorin” va “Azitromitsin”ning kombinatsiyasidan foydalanishning klinik tajribasi muvaffaqiyatli natijasi to‘g‘risida ma’lum qilgan. Fransuz olimlari “Gidroksixloroxin” preparatini alohida va antibiotik ta’sirga ega “Azitromitsin” bilan birga COVID-19’ni davolash uchun birinchi marta klinik tajribadan o‘tkazgan. Davolashning 5-kunida barcha bemorlarda koronavirusga test tahlili manfiy natija ko‘rsatgan, ya’ni 5 kun ichida klinik tajribadagi barcha bemorlar koronavirusdan sog‘aygani ta’kidlandi.