Surxondaryoda dehqon bozorida sumka qirqib 8 mln so‘m o‘g‘irlagan jinoiy guruhning kirdikorlari fosh qilindi

Surxondaryo viloyati Denov tumanida dehqon bozorida D.T. ismli ayolning 8 million so‘m pulini o‘g‘irlagan 19 yoshli muqaddam sudlangan V.A. va uning sheriklarining kirdikorlari fosh qilindi. Bu haqda Tergov departamenti xabar qilgan.

Xabarga ko‘ra, jinoyat 2020-yilning 16-mart kuni soat 15:30 da Denovdagi dehqon bozori hududida sodir etilgan. Bir necha marta sudlangan 19 yoshli V.A. tanishlari 21 yoshli M.Y (ayol), 20 yoshli N.K. (ayol) va 40 yoshli F.M. (ayol) bilan jinoiy til biriktirib, Chag‘aniyon ko‘chasida joylashgan dehon bozorida fuqaro D.T.ning sumkasidagi pullarni o‘g‘irlagan.

V.A. tuzgan reja bo‘yicha F.M., M.Y, N.K. va voyaga yetmagan S.G‘. jabrdiydaning odamlar ko‘p bo‘lgan joyga borganligidan foydalanib, uni har yonidan o‘rab olgan. V.A. o‘zi bilan birga olib kelgan o‘tkir kesuvchi jism bilan D.T.ning sumkasini kesib, sumka ichida bo‘lgan jami 8 000 000 so‘m pullarini yashirin ravishda o‘g‘irlab, jinoiy sherigi M.Y.ga berib, hodisa joyidan yashiringan.

Olib borilgan tezkor-qidiruv natijasida jinoyatni sodir etgan shaxslarning barchasi ushlangan. 8 million so‘m pul ashyoviy dalil tariqasida hujjatlashtirilib olingan.

Mazkur holat yuzasidan Denov tumani IIB huzuridagi Tergov bo‘limi tomonidan Jinoyat kodeksining 169-moddasi 2-qismi “v” bandi (Bir guruh shaxslar tomonidan oldindan til biriktirib sodir etilgan o‘g‘rilik) bilan jinoyat ishi qo‘zg‘atilgan.

Jinoyat ishi bo‘yicha V.A. va boshqalarga ayblov e’lon qilingan. V.A.ga nisbatan qamoqqa olish ehtiyot chorasi qo‘llanilgan, qolgan ayblanuvchilarga esa qamoq bilan bilan bog‘liq bo‘lmagan boshqa ehtiyot chorasi qo‘llanilib, jinoyat ishiga aloqador dalillar, ayblov xulosasi bilan tuman prokuraturasiga yuborilgan.

Iyul oyi davomida Andijonda Captiva’ni ta’qib qilib, mashina ichidagilarni kaltaklagan va ularning 500 AQSh dollarini olib qochgan to‘rt nafar shaxs ushlangani, Andijon viloyati Asaka tumanida to‘rt nafar yigit 17 yoshli o‘smirning yo‘lini to‘sib, uning yonida bo‘lgan 430 ming so‘m pulini olib qo‘ygani va qamoqqa olingani, Buxoro viloyatida jinoiy guruh sifatida tovlamachilik, o‘g‘irlik, firibgarlik jinoyatlarini sodir etgan va tanishlarining pullari hamda buyumlarini talon-toroj qilgan jinoiy guruh faoliyati fosh qilingani, Toshkent viloyati Quyi Chirchiq tumanida 25-maydan 26-mayga o‘tar kechasi 30 yoshli ayolning uyiga o‘g‘irlikka tushgan shaxs ushlangani haqida xabarlar berilgan.