Bugun,

  • USD 11095.31
  • RUB 173.84
  • EUR 10772.44

O‘zbekistonda 14-iyul soat 23:30 dan 15-iyul soat 23:30 ga qadar koronavirusga chalinish bilan bog‘liq 496 ta holat qayd etildi.

Foto: Telegram / @ssvmatbuotkotibi

Foto: Telegram / @ssvmatbuotkotibi

Yangi kasallanish holatlari

Yangi kasallanganlarning
  • 200 nafari karantin muassasalarida (kasallik aniqlangan bemorlarning barchasi xorijdan kelgach, karantinga olingan);
  • 291 nafari koronavirusga chalingan bemorlar bilan muloqotda bo‘lganligi sababli namuna olingan fuqarolar orasida (Toshkent shahrida — 131 nafar, Andijon viloyatida — 112 nafar, Namangan viloyatida — 16 nafar, Surxondaryo viloyatida — 15 nafar, Qashqadaryo viloyatida — 12 nafar, Navoiy viloyatida — 5 nafar);
  • 5 nafari aholi orasida (barchasi Namangan viloyatida) aniqlangan.
Kun davomida 6 ta hududda koronavirus bilan kasallanish holati aniqlandi. Sog‘liqni saqlash vazirligi, taxminan, ikki oydan beri koronavirusga chalinganlar bilan muloqotda bo‘lib, karantinga olinganlar orasida aniqlangan kasallik holatlari haqida xabar berib kelayotgandi. 15-iyul kuni SSV bunday holatlar haqida birontayam xabar bermadi. Ammo koronavirusga chalingan bemorlar bilan muloqotda bo‘lganligi sababli namuna olingan fuqarolar orasida aniqlangan holatlar haqida xabar bera boshladi. Shu sababmi yoki 10-iyuldan karantin kuchaytirilgani uchunmi, nima bo‘lsa ham, aholi orasidagi kasallanish holatlari birdaniga kamayib ketdi. 12-iyuldan 14-iyulgacha aholi orasida 778 kishida kasallik aniqlangandi, ya’ni oxirgi 3 kunda aholi orasida kuniga o‘rtacha 250 dan ortiq odamda kasallik qayd etilayotgandi. Endi esa aholi orasidagi holatlar birdaniga 5 taga tushib qoldi. Oxirgi marta 22-iyun kuni aholi orasida shuncha holat qayd etilgandi.

Bir kun oldin xorijdan kelib, karantinga olingan fuqarolar orasida birontayam yangi holat qayd etilgani haqida xabar berilmagandi. 15-iyulda esa SSV xorijdan kelgan 200 kishida koronavirus aniqlanganini xabar berdi. Xorijdan kelganlarning asosiy qismi Toshkent viloyatidagi “O‘rtasaroy” karantin markaziga joylashtiriladi.

Toshkent shahrida aniqlangan 131 ta holatning barchasi koronavirusga chalingan bemorlar bilan muloqotda bo‘lganligi sababli namuna olingan fuqarolar orasida qayd etildi. 8—14-iyul oralig‘ida Toshkentda aholi orasida 1163 kishi kasallik yuqtirib olgani ma’lum qilingandi. 15-iyulda esa aholi orasida birontayam yangi holat qayd etilmadi. Poytaxtda bunaqasi oxirgi marta 3-iyunda sodir bo‘lgandi.

SSV keltirayotgan jadvalda Toshkent shahri, Toshkent viloyati va Sirdaryo viloyatining ko‘rsatkichlari birga yuritilmoqda. Ayni vaqtda ushbu hududda 10,5 mingdan ortiq kishida kasallik aniqlangani ma’lum qilingan. Biroq Shavkat Mirziyoyev raisligida 15-iyul, chorshanba kuni o‘tkazilgan videoselektorda virus yuqtirganlar soni poytaxtda 4092 kishini va Toshkent viloyatida 1498 kishini tashkil etayotgani aytilgan.

Prezident raisligidagi yig‘ilishda Toshkent shahri va Toshkent viloyatida hokimlar va sektorlar rahbarlari ishonib topshirilgan hududlardagi haqiqiy ahvolni o‘rganmagani aytildi. “Tibbiyot muassasalaridagi real vaziyatni bilmaydi. Aholini virusdan ogohlantirish va saqlash, kasallarni o‘z vaqtida va to‘g‘ri davolash uchun mas’uliyatni his qilmagan”, — dedi davlat rahbari.

Koronavirus tarqalishining oldini olish va davolash bo‘yicha Toshkent shahridagi ishlarni talab darajasida tashkil etmagani, epidemiologik vaziyatning salbiy o‘zgarishlariga tayyor bo‘lishni ta’minlamagani, bu kasallik bilan “pastga tushib” mukammal shug‘ullanmagani uchun sog‘liqni saqlash vaziri Alisher Shodmonov va Toshkent shahar hokimi Jahongir Ortiqxo‘jayevga hayfsan e’lon qilindi. Shahar va viloyatning barcha sektor rahbarlari jiddiy ogohlantirildi.

15-iyuldagi videoselektorda Prezident koronavirus bilan bog‘liq murakkab vaziyatdan chiqib ketish bo‘yicha Namangan, Farg‘ona va Samarqand viloyatlari qatorida Andijonni ham misol qilib keltirib, og‘ir sharoitdan mazkur hududlardagi birinchi rahbarlar fidoyiligi, qattiqqo‘lligi uchun chiqib ketilganini ta’kidlagandi. Andijon viloyatida kun davomida koronavirusga chalingan bemorlar bilan muloqotda bo‘lganligi sababli namuna olingan fuqarolar orasida 112 ta holat aniqlandi. Bu viloyat uchun yangi antirekord. Andijonda ilgari bir kunda aniqlangan kasalliklar soni hech qachon 100 taga ham yetmagandi. 6-iyulda 80 kishida kasallik aniqlanishi Andijon uchun eng katta ko‘rsatkich bo‘lib turgandi. Oy boshida viloyatda koronavirusga chalinish holatlari 209 tani tashkil etayotgandi. Ammo 2 hafta ichida bemorlar soni 496 nafarga yetdi. Andijonda jami kasallanish holatlarining 58 foizi aynan iyul oyida sodir bo‘ldi. Andijon, shuningdek, shifoxonalardagi bemorlar soni bo‘yicha Toshkentdan so‘ng ikkinchi o‘rinda turibdi.

Namangan viloyatida kun davomida 21 ta holat qayd etildi. Ushbu holatlarning 16 tasi koronavirusga chalinganlar bilan muloqotda bo‘lib, karantinga olingan fuqarolar orasida, 5 nafari aholi orasida aniqlandi. Kun yakunida Namangandagi 16 ta holat koronavirusga chalingan bemorlar bilan muloqotda bo‘lganligi sababli namuna olingan fuqarolar orasidagi holatlarga kiritildi. Oy boshidan beri viloyatda 164 kishida kasallik aniqlandi. Bu Namangandagi jami kasallanish holatlarining 35 foizi deganidir.

Surxondaryo viloyatida koronavirusga chalingan bemorlar bilan muloqotda bo‘lganligi sababli namuna olingan fuqarolar orasida 15 ta holat aniqlangan. Iyul oyining o‘zida viloyatda 122 kishida kasallik aniqlandi. Bu Surxondaryoda aniqlangan barcha kasallanish holatlarining 55 foizi deganidir.

Qashqadaryo viloyatida koronavirusga chalingan bemorlar bilan muloqotda bo‘lganligi sababli namuna olingan fuqarolar orasida 12 ta holat aniqlangan. Toshkent, Buxoro, Samarqand, Namangan va Andijondan keyin Qashqadaryoda ham kasallanganlar soni 400 nafardan oshdi. Iyul oyida viloyatda kasallanganlar soni 212 nafarga ko‘paydi. Qashqadaryodagi kasallanish holatlarining 52 foizi iyul oyiga to‘g‘ri keldi.

Navoiy viloyatida aniqlangan 5 ta holat koronavirusga chalingan bemorlar bilan muloqotda bo‘lganligi sababli namuna olingan fuqarolar orasida qayd etildi. Xorazm va Farg‘ona viloyatlaridan so‘ng Navoiy foiz hisobida iyul oyida kasallar soni ko‘payishi bo‘yicha eng past ko‘rsatkichlardan birini ko‘rsatmoqda. Viloyatdagi umumiy kasallanish holatlarining 22 foizi iyul oyiga to‘g‘ri kelmoqda. Ammo shu oyning o‘zida viloyatda 4 kishi vafot etdi. Ushbu o‘lim holatlarining hozircha 3 tasi SSV tomonidan tasdiqlangan.

O‘lim holatlari va ahvoli og‘ir bemorlar

Kun davomida SSV 4 ta o‘lim holati haqida xabar berdi. Shuningdek, Davlat xizmatlari agentligi ham o‘z xodimining koronavirusdan vafot etganini ma’lum qildi. Vafot etganlarning bari erkaklardir.

Birinchi o‘lim. Toshkent shahrining Chilonzor tumanida 66 yoshli I.I. ismli erkakda 5-iyulda hansirash, yo‘tal paydo bo‘lgan va u uy sharoitida davolanishni boshlagan.

Ammo ahvoli og‘irlashavergach, 8-iyul kuni tez tibbiy yordam mashinasida Zangiota tuman ko‘p tarmoqli yuqumli kasalliklar shifoxonasiga olib kelingan. Nafas yetishmovchiligi belgilari kuchaygani sababli reanimatsiya bo‘limiga yotqizilgan. Unga COVID-19 infeksiyasi o‘ta og‘ir kechishi, ikki tomonlama pnevmoniya tashxisi qo‘yilgan. Kasallik o‘tkir nafas hamda surunkali buyrak yetishmovchiligi bilan kechgan. Shuningdek, yurak ishemik kasalligi, gipertoniya, qandli diabet, bosh miya qon tomirlari aterosklerozi kabi hamroh kasalliklari bilan ham og‘rigan.

Shifokorlar tomonidan standartlar asosida o‘tkazilgan reanimatsion muolajalarga qaramasdan bemorning ahvoli keskin og‘irlashib, o‘tkir nafas, surunkali buyrak hamda o‘pka-yurak yetishmovchiligidan vafot etgan. 66 yoshli erkak koronavirus asoratlaridan vafot etgan Toshkent viloyatidagi oltinchi, O‘zbekistondagi 68-bemor bo‘ldi.

Ikkinchi o‘lim. Toshkent viloyati Piskent tumanida yashovchi 37 yoshli M.M. ismli erkakda 3-iyulda hansirash, yo‘tal paydo bo‘lgan va u uy sharoitida davolanishni boshlagan. Ammo ahvoli og‘irlashgach, 9-iyulda tez tibbiy yordam mashinasida Zangiota ko‘p tarmoqli yuqumli kasalliklar shifoxonasining reanimatsiya bo‘limiga yotqizilgan.

12-iyul kuni esa bemorda o‘pka arteriyasi tromboemboliyasi belgilari boshlangan va sun’iy nafas oldirish apparatiga ulangan. Unga COVID-19 infeksiyasi o‘ta og‘ir kechishi, ikki tomonlama pnevmoniya tashxisi qo‘yilgan. Kasallik o‘pka arteriyasi tromboemboliyasi, o‘tkir nafas yetishmovchiligi bilan kechgan.

Shifokorlar tomonidan standartlar asosida o‘tkazilgan reanimatsion muolajalarga qaramasdan, bemorning ahvoli keskin og‘irlashib, o‘pka arteriyasi tromboemboliyasi, o‘tkir nafas va o‘pka-yurak yetishmovchiligidan vafot etgan. 37 yoshli erkak koronavirus asoratlaridan vafot etgan Toshkent viloyatidagi yettinchi, O‘zbekistondagi 69-bemor bo‘ldi.

Uchinchi o‘lim. IIV matbuot xizmati 13-iyul, dushanba kuni Toshkent shahar IIBB Axborot texnologiyalari, aloqa va axborotni himoyalash bo‘limi boshlig‘i o‘rinbosari, mayor A’loxon Shomahmudovning vafot etganini e’lon qildi. 15-iyul kuni uning koronavirusdan vafot etganini “Daryo”ning ichki ishlar organlaridagi manbasi ma’lum qildi.

Foto: IIV matbuot xizmati

Foto: IIV matbuot xizmati

Ushbu o‘lim holatini SSV kun oxirida tasdiqladi.

“Olmazor tumanida yashovchi 36 yoshli Sh.A. tana harorati ko‘tarilishi, umumiy holsizlik sababli Toshkent shahar Ichki ishlar bosh boshqarmasi tibbiyot bo‘limi poliklinikasiga murojaat qilgan. Shundan so‘ng COVID-19 infeksiyasiga namuna topshirgan va 13-iyul kuni kasallik tasdiqlangan.

Bemor Toshkent shahar Ichki ishlar bosh boshqarmasi tibbiyot bo‘limi poliklinikasi tomonidan tibbiy kuzatuvda bo‘lgan. So‘nggi kunlarda bemorning tana harorati tushmagan. U o‘tkir yurak-qon tomir va nafas yetishmovchiligidan vafot etgan”, — deyiladi SSV xabarida.

Toshkent shahar IIBB mayorining o‘limi Sog‘liqni saqlash vazirligi tomonidan 2 kun kech e’lon qilindi. Vaholanki, SSV xabarida bemorda 13-iyul kuni koronavirus tasdiqlangani aytilgan.

36 yoshli erkak koronavirus asoratlaridan vafot etgani SSV tomonidan tasdiqlangan 70-bemor bo‘ldi.

To‘rtinchi o‘lim. Ichki ishlar vazirligi 14-iyul, seshanba kuni IIV Migratsiya va fuqarolikni rasmiylashtirish bosh boshqarmasi bo‘limi boshlig‘i podpolkovnik Shavkat Nafasovning vafoti munosabati bilan ta’ziya e’lon qildi. “Daryo”ning ichki ishlar organlaridagi manbasi uning koronavirusdan vafot etganini ma’lum qildi.

IIV matbuot xizmati

IIV matbuot xizmati

IIV podpolkovnigining vafoti haqida 15-iyul kuni SSV ma’lumot berdi.

Vazirlik aborot xizmatining xabariga ko‘ra, Toshkent tumanida yashagan 48 yoshli Sh.N. 2020-yil 24-iyunda xizmat safari bilan Surxondaryo viloyatida bo‘lib, tana harorati ko‘tarilganligi va holsizlik sabab viloyat Ichki ishlar boshqarmasi tibbiyot bo‘limiga murojaat qilgan. Unda COVID-19 infeksiyasi tasdiqlangach, viloyat shifoxonasiga yotqizilgan. Bemorda o‘tkir nafas yetishmovchiligi kuzatilgan.

Unga COVID-19 infeksiyasi va ikki tomonlama pnevmoniya og‘ir kechishi, o‘tkir nafas yetishmovchiligi, yurak ishemik kasalligi, surunkali bronxit tashxisi qo‘yilgan. 14-iyul kuni uning ahvoli keskin og‘irlashgan. Reanimatsiya bo‘limi shifokorlarining muolajalariga qaramasdan bemor o‘tkir yurak-qon tomir va nafas yetishmovchiligidan vafot etgan.

IIV podpolkovnigi koronavirus asoratlaridan vafot etgani SSV tomonidan tasdiqlangan O‘zbekistondagi 71-bemor bo‘ldi.

Beshinchi o‘lim. Davlat xizmatlari agentligi jamoasi Davlat xizmatlari agentligi Navoiy viloyati boshqarmasining mas’ul xodimi Adhamjon Dehqonovning vafoti munosabati bilan marhumning qarindosh va yaqinlariga chuqur ta’ziya izhor etdi. Agentlik xabarida Adhamjon Dehqonovning koronavirusdan vafot etgani aytiladi. Marhum 61 yoshda bo‘lgan.

Foto: DXA

Foto: DXA

Adliya vaziri matbuot kotibi Sevara O‘rinboyevaning o‘z Telegram kanalida yozishicha, Adhamjon Dehqonov ko‘p yillar malakali huquqshunos sifatida xalq xizmatida bo‘lgan, asosan huquq tartibot idoralarida faoliyat yuritgan, prokuratura tizimi uchun qator islohotlarda ishtirok etgan. U 2018-yilning dekabr oyidan Davlat xizmatlari agentligi sohasiga kirib kelgan va tizimda yoshlarga murabbiylik qilgan.
Adhamjon Dehqonov koronavirus asoratlaridan vafot etgan Navoiydagi to‘rtinchi, O‘zbekistondagi 72-bemor bo‘ldi. Uning o‘limi haqida SSV tomonidan hozircha axborot berilmagan.Ayni paytda tibbiyot muassasalarida davolanayotgan 5855 nafar bemordan 51 nafari og‘ir, 6 nafari esa o‘ta og‘ir ahvolda. Bir kun avval ahvoli og‘ir bemorlar soni 52,  ahvoli o‘ta og‘ir bemorlar 6 nafarni tashkil etayotgandi. Bu orada 5 kishining (ulardan 4 nafarining o‘limini SSV tasdiqlagan) koronavirusdan vafot etgani ma’lum bo‘ldi.

Kasallikdan davolanish

15-iyul kuni Toshkent shahridagi tibbiyot muassasalarida 135 nafar, Qashqadaryo viloyatida 97 nafar, Samarqand viloyatida 49 nafar, Surxondaryo viloyatida 34 nafar, Jizzax viloyatida 9 nafar hamda Farg‘ona viloyatida 4 nafar, jami 328 nafar bemor koronavirusdan sog‘aydi. Birinchi marta bir kunda koronavirusdan sog‘ayganlar soni 300 nafardan oshib, rekord o‘rnatildi.

Hozirda kasallik qayd etilgan jami 14 581 nafar bemordan 8655 nafari sog‘ayib, davolanish ko‘rsatkichi 59 foizni tashkil etmoqda. Bu boradagi ko‘rsatkich ikki kundan buyon o‘zgarmayapti. Qashqadaryo viloyatida bir kunda 97 nafar bemor sog‘ayganidan so‘ng davolanish ko‘rsatkichi 50 foizdan past bo‘lgan birontayam hudud qolmadi. Hozirda bu boradagi eng past ko‘rsatkich Toshkentga tegishli — 52 foiz.

15-iyul kuni o‘tkazilgan yig‘ilishda Shavkat Mirziyoyev Toshkent shahri va viloyatida aholini virusdan ogohlantirish va saqlash, kasallikni o‘z vaqtida va to‘g‘ri davolash uchun mas’uliyat umuman his qilinmaganini tanqid qildi. Sog‘liqni saqlash vazirligi tomonidan ham keyingi bir oyda koronavirusni davolash strategiyasi va taktikasi keskin buzilgani, real holatdan kelib chiqib, davolash amaliyoti o‘zgartirilmagani tanqid ostiga olindi.

“Shifokorlar tomonidan bemorlarga nisbatan befarqlik va sovuqqonlik holatlariga ham yo‘l qo‘yilmoqda”, — dedi davlat rahbari.

Shavkat Mirziyoyev O‘zbekiston bo‘yicha jami kasallarning 40 foizi Toshkent shahriga to‘g‘ri kelayotganini qayd etib o‘tdi.

Agar bu yerda sadoqatli odamlar o‘tirganida, siyosatga xayrixoh odamlar o‘tirganida, Toshkentda shunday sharmandalik mumkinmidi? Toshkentda iloji bor-ku hamma narsaning”, — dedi Prezident.

Shuningdek, yig‘ilishda bu ikki hududda koronavirus tarqalishiga qarshi kurash va aholini davolash ishlariga aloqador barcha vazirlik va idoralaryirik tibbiyot muassasalari rahbarlaridan iborat 24 soat ishlaydigan shtablar tashkil qilish ko‘rsatmasi berildi. Toshkent shahri va viloyatidagi poliklinikalar huzuridagi mobil guruhlar sonini uch barobar ko‘paytirish vazifasi yuklatildi. Zangiota tumanida yaqinda ish boshlagan shifoxonadagi joy sonini yana 1000 o‘ringa ko‘paytirish topshirig‘i berildi.

Ayni paytda 5855 nafar bemordan 4994 nafari Toshkent shahri va viloyatida davolanmoqda. Farg‘onada 10, Xorazmda 21, Jizzaxda 22, Navoiyda 49, Surxondaryoda 58, Buxoroda 60, Qoraqalpog‘istonda 63, Samarqandda 129 va Qashqadaryoda 131, Namanganda 145 va  Andijonda 173 nafar bemor qoldi.

Telegram’dagi “Troll.uz” kanalida COVID-19’ga topshirgan test natijasi “manfiy” chiqqan odamlarni karantinda ushlab turib, ma’lum muddat o‘tgach ularni koronavirus infeksiyasidan davolash uchun millionlab so‘m xarajat qilingani haqidagi hujjatlarga imzo qo‘ydirib olish holatlarining uchragani haqida post e’lon qilingandi. Bosh prokuratura ushbu xabar yuzasidan o‘rganish olib borilishini ma’lum qilgan.

Karantindagilar

Hozirda O‘zbekistonda uy karantinida 57 500 nafar, statsionar karantinda esa 21 738 nafar fuqaro tibbiy kuzatuvda bo‘lib turibdi. Bir kun ichida uy karantinidagilar soni 1843 nafarga ko‘paygan bo‘lsa, statsionar karantindagilar soni 847 nafarga kamaydi. Iyun va iyul oylarida uy karantinidagilar soni 57 mingga hech ham yetmagandi.

Izoh
Asosiy yangiliklar
Dunyo
Zelenskiy Rossiyaga sanksiyalarni chetlab o‘tishda yordam berayotgan davlatlarga qarshi ochiq kurash olib borishga va’da berdi
Dunyo
Iordaniya shahzodasining dabdabali to‘yi, sirkdan qochgan lamalar, plakat “ushlab olgan” it — 2-iyun suratlari
Dunyo
Yaponiyada “Mavar” to‘foni tufayli milliondan ortiq odam evakuatsiya qilindi