“Endi ‘tez yordam’ 15 daqiqa ichida yetib boradi, koronavirusga test natijalari bir kunda chiqadi” — bosh prokuror Nig‘matilla Yo‘ldoshev

O‘zbekiston bosh prokurori Nig‘matilla Yo‘ldoshev 15-iyul kuni prezident videoselektoridan so‘ng “O‘zbekiston 24” telekanaliga bergan intervyusida davlat rahbari tomonidan berilgan muhim topshiriqlarni sanab o‘tdi.

“Birinchi topshiriq shundan iborat bo‘ldiki, fuqarolarimiz o‘zi bezovta bo‘layotgan holatlar yuzasidan tibbiyot muassasalariga 103 raqami orqali tez yordamga murojaat qilishlarida biron bir bandlik holatlari bo‘lmasligi to‘g‘risida topshiriq berdilar.

Bu borada tegishli davlat organlarining imkoniyatlarini ishga solgan holda, murojaatlarni qabul qilish, o‘z vaqtida o‘rganish va birlamchi tibbiy yordamni o‘z vaqtida ko‘rsatish choralari ko‘riladi.

Bundan buyon har bir fuqaromiz 103 ga murojaat qilganda, bandlik holatlari, ayniqsa uzoq vaqt band bo‘lish holatlariga mutlaqo chek qo‘yiladi.

Ikkinchi topshiriq – tez tibbiy yordam xizmatini yana kuchaytirish. Bu borada tegishli malakali tibbiyot xodimlari, tibbiy texnika vositalari va transport vositalarini yanada ko‘paytirish, aholiga qulay tez yordam ko‘rsatish vazifasi oldimizga qo‘yildi.

Bundan buyon 15 daqiqadan ko‘p bo‘lmagan vaqtda zudlik bilan tez tibbiy yordam avtomashinalari tegishli xodimlar bilan yetib borishi to‘liq ta’minlanadi.

Uchinchi masala fuqarolarimizdan test namunalarini o‘z vaqtida olish va ularning javoblarini imkon qadar zudlik bilan chiqarish bo‘yicha bor imkoniyatlarni yanada safarbar qilib, test namunalari tahlillarini uzog‘i bilan ertasi kuniga chiqarib berish va javoblarni murojaat qilgan fuqarolarimizga o‘z vaqtida yetkazish choralari ham ko‘riladi.Eng asosiy topshiriqlardan biri shu bo‘ldiki, tibbiy dori-darmonlarga, tibbiyot vositalariga bo‘lgan ehtiyojni to‘laqonli qondirishga alohida e’tibor qaratildi. Bu borada kechaning o‘zida prokuratura organlari tomonidan Toshkent shahridagi mavjud 1700 dan ortiq dorixonalar rahbarlari rasman ogohlantirildi.

Koronavirusdan profilaktika qilish uchun 5 turdagi va kasallikni davolashga mo‘ljallangan 9 turdagi majburiy tartibdagi dori vositalarini kamida 1 oy, yoki 2-3 oylik zaxirasini to‘liq ta’minlash va ularni arzon narxlarda aholiga sotish tartibi ham joriy qilindi”, — dedi Nig‘matilla Yo‘ldoshev.

Eslatib o‘tamiz, Prezident Shavkat Mirziyoyev 15-iyul, chorshanba kuni Toshkent shahri va Toshkent viloyatida pandemiya bilan bog‘liq vaziyat muhokamasiga bag‘ishlangan videoselektor yig‘ilishi o‘tkazgan va unda dorixonalarda virus va isitmaga qarshi preparatlar narxi asossiz, bir necha barobar oshirib yuborilganini tandiq qilgandi.

Shuningdek, Prezident Toshkent shahridagi vaziyatni sharmandalik deb atadi hamda ikki hudud rahbarlarini tanqid qildi. Koronavirusga qarshi kurashni samarali tashkil qilmagani uchun sog‘liqni saqlash vaziri Alisher Shodmonov va Toshkent shahar hokimi Jahongir Ortiqxo‘jayevga hayfsan berdi.

Prezident 14-iyul kuni o‘tkazilgan videoselektorda koronavirusga qarshi kurash uchun mamlakatda barcha zaxira va imkoniyatlar mavjudligini ta’kidlagan, biroq hozirda epidemiologik vaziyat juda og‘irligini aytgandi. Shuningdek, davlat rahbari koronavirusni aniqlash uchun test topshirish jarayonini soddalashtirish, hududlarda uch oylik dori zaxirasini yaratish hamda dorixonalarda va bozorlarda narxlar oshishining oldini olish, zarur joylarda karantin choralarini kuchaytirish bo‘yicha topshiriq bergan.