Boku aholisi Armaniston va Ozarbayjon chegarasida yuzaga kelgan jangovar harakatlar sabab mamlakat armiyasini qo‘llab-quvvatlash maqsadida noqonuniy miting o‘tkazdi, deb xabar beradi “Oxu.az”.
Miting ishtirokchilari “Shahidlar o‘lmaydi, Vatan bo‘linmaydi”, “Qorabog‘” va “Qorabog‘ga ozodlik” shiorlari ostida chiqish qilgan.
Shuningdek, yig‘ilganlar harbiy harakatlarni qayta boshlashga chaqirib, “o‘zlariga qurol berilishini” talab qilib baqirgan.
Massive protest in Baku tonight with protestors wanting Azerbaijan to take action against Armenia after 3 days of clashes at the border #Azerbaijan #Armenia pic.twitter.com/nEQt42xkCm
— CNW (@ConflictsW) July 14, 2020
Report nashrning yozishicha, minglab yoshlar mamlakat bayrog‘ini ko‘tarib olib, “Shahidlar alleyasi”dan yurib o‘tgan. Shu turdagi mitinglar Ozarbayjonning boshqa shaharlarida ham o‘tkazilgan.
“RIA Novosti”ning ma’lum qilishicha, namoyish ishtirokchilari Bokudagi parlament binosiga kirishga uringan va politsiya ularni quvib yuborish uchun “vodomyot”lardan foydalangan. Telegram’dagi “Infoteka24” axborot portalining yozishicha, namoyishchilar parlament binosiga kirishga muvaffaq bo‘lgan. Kanal miting ishtirokchilari bino ichida yurgani, shuningdek, huquq-tartibot organlari xodimlar ichkariga kirayotgani tasvirlangan videoni e’lon qilgan.
Eslatib o‘tamiz, ikki davlat qo‘shinlari o‘rtasidagi to‘qnashuv Ozarbayjon shimoli-g‘arbidagi Tovuz viloyati hududida 12-iyulda sodir bo‘lgan. Ozarbayjon Mudofaa vazirligi Armanistonni o‘t ochish haqidagi ahdlashuvni qo‘pol ravishda buzganlik va mamlakat artilleriyasi joylashgan pozitsiyaga hujum qilganlikda ayblamoqda. Idora bergan ma’lumotga asosan, ikkala tomonda ham jang qurbonlari bor.
13-iyulda ikkala tomon ham bir-biriga takroriy tarzda yana o‘t ochgan. Armaniston mudofaa vazirligi matbuot kotibi Shushan Stepanyanning aytishicha, ikki yoki uch soat davom etgan tanaffusdan keyin ozarbayjonlik harbiylar yana hujumga o‘tgan va bunga munosib javob qaytarilgan. Rasmiy Boku bergan ma’lumotga ko‘ra, Ozarbayjon artilleriyasi, minomyotlari va tanklari arman tayanch punktini vayron qilgan, harbiy texnikani buzgan va askarlarni ham halok etgan.
Izoh (0)